Eldegi qurylystyń 25 paıyzy elordada júrgizilip jatyr - sarapshy
ASTANA. KAZINFORM – Búgin Astana qalasy Kásipkerler palatasynyń qurylys máselesine arnalǵan salalyq keńesiniń otyrysy ótti.
Jıyn barysynda elordada 2023-2029 jyldarǵa arnalǵan turǵyn úı qoryndaǵy renovatsııa baǵdarlamasyna ózgeris engizý, sondaı-aq jergilikti atqarýshy organdar úshin Qazaqstan Turǵyn úı kompanııasy jelisi boıynsha jalǵa beriletin baspanany satyp alý erejesin túzetý taqyryby qaraldy.
- Jalpy qurylys kóleminiń 25 paıyzdan astamy elordada júzege asyp jatyr. Sondyqtan Qazaqstan Turǵyn úı kompanııasymen ózara is-qımyl tártibinde jumys isteý mańyzdy. Atap aıtqanda, 1 qyrkúıekten bastap úlestik qurylysqa qatysý jáne turǵyn úı salasyndaǵy is-sharalarǵa qatysty tıisti zańdaǵy túzetýler kúshine enedi. Renovatsıı baǵdarlamasy jergilikti atqarýshy organdarmen jáne olardyń turǵyn úı saıasatymen retteletinin eskerý mańyzdy, - dedi Astana qalasy Kásipkerler palatasynyń qurylys máselesine arnalǵan salalyq keńesiniń tóraǵasy Vıacheslav Lazarev.
Onyń paıymynsha, úlestik qurylysty qarjylandyrý tetigin qaıta qarastyrý qajet. Sondyqtan aldaǵy ýaqytta osy salaǵa mán bergen jón.
Eske salsaq, bıyl maýsym aıynda Memleket basshysy «Qazaqstan Respýblıkasynyń keıbir zańnamalyq aktilerine turǵyn úı qurylysyna úlestik qatysý, avtomobıl joldary jáne múgedektigi bar adamdardy tasymaldaý jónindegi qyzmetterdi kórsetý máseleleri boıynsha ózgerister men tolyqtyrýlar engizý týraly» zańǵa qol qoıdy.
Túzetýlerdiń birinshi blogy úlestik qurylys protsesteriniń zańdylyǵy men ashyqtyǵyn qamtamasyz etýge, úleskerlerdiń quqyqtary men zańdy múddelerin qorǵaýǵa baǵyttalǵan.