Eldegi kúl úıindileriniń aýmaǵy 18,2 myń gektarǵa jetken

ASTANA. KAZINFORM — El aýmaǵyndaǵy kúl úıindileriniń kólemi 1,41 mlrd tekshe metrge jetken. Energetıka mınıstri Erlan Aqkenjenov Úkimet otyrysynda osyndaı derek keltirdi.

— Búgingi tańda elimizde 227 elektr stantsııasy jumys isteıdi. Bul rette onyń ishinde kómirdi negizgi otyn retinde paıdalanatyn iri energııa óndirýshi uıymdardyń sany — 21. Osy energııa óndirýshi uıymdar aýdany 18,2 myń gektar 27 kúl úıindisin paıdalanady. Kúl úıindileriniń jalpy kólemi — 8,23 mlrd tekshe metr, onyń 1,41 mlrd tekshe metri toltyryldy. 2024 jyly kúldi óńdeýmen aınalysatyn kompanııalar 69,2 myń tonna kúldi óńdedi, — dedi ol.

Sondaı-aq, mınıstr kúldi óńdeý ásirese tsement pen beton óndirý salasyna tán ekenin aıtty.

— Qazaqstanda kúldiń quramy ónerkásip talaptaryna sáıkes kelmeıdi. Qazaqstandyq jylý energııa ortalyqtary men memlekettik aýdandyq elektr stantsııalary negizinen quramynda janbaıtyn qospalary joǵary qońyr jáne tas kómirdi paıdalanady. Sondaı-aq, kúl-qoj qaldyqtarynda kúkirt qosylystary men synap, qorǵasyn, myshıak sııaqty aýyr metaldar bar, bul qurylystaǵy kúldiń qunyn tómendetedi. Osyǵan baılanysty qosymsha tazalaý jáne qaıta óńdeý qajet, bul sońǵy ónimniń ózindik qunyn arttyrady, — dedi Erlan Aqkenjenov.

Aıta ketelik elimizde karbondy polıgondar qurylatyny týraly jazǵan edik.