Eldegi qolma-qol aqsha kólemi 4,7 trln teńgege jetti
ASTANA. KAZINFORM — Qazaqstan qarjygerler qaýymdastyǵy 2025 jyldyń qorytyndysy boıynsha eldegi qolma-qol aqshasyz tólemder naryǵyna qatysty analıtıkalyq materıal jarııalady.
Qaýymdastyq derekterine sáıkes, esepti kezeńde qolma-qol aqshasyz kartochkalyq tranzaktsııalar kólemi 186 trln teńgege jetti. Bul 2024 jylmen salystyrǵanda 13%-ǵa artyq. Kórsetkish jalpy ishki ónimniń 187%-yna teń boldy.
Taldaýda ósimniń makroekonomıkalyq jáne qurylymdyq faktorlarmen baılanysty ekeni atap ótilgen.
— Bólshek saýda kólemi 7,5%-ǵa ósip, 26,4 trln teńgeni, al kóterme saýda 9,5%-ǵa artyp, 53,5 trln teńge boldy. Onlaın-bankıng paıdalanýshylarynyń sany 25,9 mln-nan 34,3 mln adamǵa deıin kóbeıgen. Saýda kásiporyndarynyń sany 886,6 myńnan 944,9 myńǵa deıin ulǵaıdy. Bul qolma-qol aqshasyz esep aıyrysýlardyń odan ári keń taralýyna yqpal etti, — delingen qaýymdastyqtyń taldaýynda.
Sonymen birge qolma-qol aqshasyz operatsııalardyń úlesi 87,2%-ǵa deıin artty. 2024 jyly bul kórsetkish 86,7% bolǵan.
2025 jyly aınalystaǵy qolma-qol aqsha kólemi 4,7 trln teńgege jetti. Bul 2024 jylǵy 4,4 trln teńgemen salystyrǵanda 8,6%-ǵa joǵary.
Orta eseppen árbir qazaqstandyqqa shaqqanda 232 myń teńge qolma-qol aqsha tıesili. 2024 jyly bul kórsetkish 216 myń teńge bolǵan. 2025 jyly bankomattar arqyly 27,3 trln teńge kóleminde qolma-qol aqsha alynǵan. Bir jyl buryn bul kórsetkish 25,4 trln teńge edi. Ósim 8% boldy.
Qolma-qol aqsha alýdyń jalpy ósiminiń 83%-y Almaty qalasyna (+1,2 trln teńge), Astanaǵa (+217 mlrd teńge) jáne Shymkent qalasyna (+154 mlrd teńge) tıesili.
Esepti jyly qolma-qol aqshasyz tólemder qurylymynda QR-tólemderdiń úlesi 9,8%-dan 10,3%-ǵa deıin artty. POS-termınaldar arqyly tólem jasaý úlesi 9,5%-dan 9,6%-ǵa deıin ózgerdi. Internet-tólemderdiń úlesi 80,7%-dan 80,0%-ǵa deıin tómendedi.
Sonymen qatar bankomat arqyly qolma-qol aqsha alatyn azamattarǵa qatysty derekter bazasy qurylmaıtynyn jazǵanbyz.
Aıta keteıik, Tájikstannyń ulttyq banki ótken jyly elde qolma-qol aqshasyz jasalǵan operatsııalar sany ósip, 2024 jylmen salystyrǵanda olardyń sany 47% jetkenin jazǵanbyz.