Eldegi kólikterdiń jartysy 20 jyldan beri qoldanysta júr

ASTANA. KAZINFORM – Qazaqstanda avtokólikterdiń 50%-dan astamy 20 jyldan beri paıdalanylyp keledi. Bul týraly QR Іshki ister mınıstriniń orynbasary Igor Lepeha Úkimet otyrysynda málimdedi.

Onyń aıtýynsha, eldegi avtoparktiń ósýimen qatar kólikterdiń tozýy da baıqalyp otyr.

Tehnıkalyq baıqaý sapasyna qatysty da máseleler bar, óıtkeni bul qyzmet básekelestik ortada júrgizilip keledi.

– Osy ýaqyt ishinde 178 myń aqaýly kólikti basqarý faktisi (Ákimshilik quqyqbuzýshylyqtar týraly kodekstiń 590-baby, 5 jáne 7-bólikteri), 102 myń tehnıkalyq baıqaýdan ótpegen kólikti paıdalaný jaǵdaıy (590-bap, 9-bólik) anyqtaldy, – dedi Igor Lepeha.

I. Lepeha QR Kólik mınıstrligine jol qaýipsizdigin arttyrý maqsatynda tehnıkalyq baıqaý stantsııalaryn baqylaýdy kúsheıtýdi usyndy. 

Aıta keteıik, jyl saıyn elimizdiń joldarynda 2 myńnan astam adam jol apatynan qaza taýyp, 20 myńnan astamy jaraqat alady.

Sonymen birge, joldardy qabyldaý komıssııalaryna polıtsııany qaıta qosý usynyldy.