Eldegi kınoteatrlarda prokatqa neshe fılm shyǵaryldy
ASTANA. KAZINFORM — Jyl basynan elimizdegi kınoteatrlarda prokatqa neshe sheteldik jáne otandyq fılm shyǵaryldy? Bul suraqqa QR Mádenıet jáne aqparat mınıstrliginiń Mádenıet komıteti jaýap berdi.
- Jyl basynan 60 otandyq fılm (onyń ishinde 10 ulttyq fılm), 200-den astam sheteldik fılm kınoprokatqa shyqty. Sonymen qatar, bıyl Mınıstrlik jáne Kıno ortalyǵynyń qoldaýymen túsirilgen 10 ulttyq fılm qazirgi qazaq qoǵamyndaǵy ózekti máselelerdi, ulttyq bolmysty jáne jas urpaq tárbıesine oń áser etetin ıdeıalardy kıno tilimen jetkizýdi maqsat etedi, - delingen Mádenıet komıtetiniń Kazinform agenttigine bergen jaýabynda.
Atap aıtqanda, aýyl tirshiligin sýretteıtin «Tezek», kókparǵa arnalǵan «Fake-ovyı Arman», otandyq fýtbol jaıly «90+1», Tatarstanmen birlesip túsirilgen «Tarlan», qumar oıynǵa táýeldilik máselesin kóteretin «Igromanka», roýd-mývı janryndaǵy «Joqtau» jáne aǵza transplantatsııasy taqyrybyn qozǵaıtyn «Aromatnoe serdtse», alǵashqy apat týraly «Qaıtadan» kórkem fılmderi jaryqqa shyqty. Sonymen qatar Ekinshi dúnıejúzilik soǵys jyldaryndaǵy operator qyzdardyń erligine arnalǵan «Qara qyz», balalar kontentin nasıhattaýǵa arnalǵan «Altyn adam» anımatsııalyq fılmi kórermen nazaryna usynyldy.
- Jyl sońyna deıin memlekettiń qoldaýmen túsirilgen birneshe ulttyq fılmniń prokatqa shyǵýy josparlanǵan. Aıta ketý kerek, Ulttyq kınony qoldaý memlekettik ortalyǵy shet memleketter men el aımaqtarynda «Qazaq kınosynyń kúnderin» uıymdastyrýdy dástúrge aınaldyrǵan. Bıyl jyl basynda bastalǵan is-shara Qaraǵandy, Jambyl, Soltústik Qazaqstan jáne Batys Qazaqstan, Pavlodar oblystarynda ótkizildi. Aldaǵy ýaqytta kıno kúnderi ózge qalalar men óńirlerde de jalǵasyn tabady. Sharanyń basty maqsaty – shalǵaıdaǵy aǵaıynǵa ulttyq kınonyń búgingi damý deńgeıin tanystyrý, kórermen men kıno óneri arasyndaǵy baılanysty nyǵaıtý jáne otandyq kınotýyndylardy keńinen nasıhattaý, - dep atalyp ótken vedomstvo aqparatynda.
Aıta keteıik, Mádenıet jáne aqparat mınıstrliginiń Mádenıet komıteti elimizde fılmdi qazaq tilinde dýblıajdaý kórsetkishine qatysty túsinik berdi.