Qazaqstandaǵy kınoprokat naryǵyna biryńǵaı erejeler engizý usynyldy
ASTANA. KAZINFORM — Qazaqstanda kınoprokat naryǵyndaǵy básekelestikti damytý úshin kınoteatrlar men dıstrıbıýtorlardyń ózara jumys isteý tártibin birizdendirý usynyldy.
Agenttik júrgizgen taldaý kınoprokat naryǵynyń 60-tan astam qatysýshysynyń qyzmetin qamtyǵan. Zertteý barysynda saladaǵy básekelestiktiń damýyna kedergi keltiretin birqatar júıeli másele anyqtalǵan.
Atap aıtqanda, naryqtyń joǵary deńgeıde shoǵyrlanǵany belgili boldy. Naryqtaǵy eń iri oıynshy — Kinopark-Kinoplexx Theatres jelisi. Ekinshi orynda Chaplin Cinemas tur.
Sonymen qatar keıbir óńirlerde kınoprokat qyzmetin nebári bir nemese eki kompanııa kórsetedi. Agenttik munyń naryqtaǵy básekelestiktiń shekteýli ekenin kórsetetinin atap ótti.
Agenttik anyqtaǵan negizgi problemalardyń biri — kınoteatrlar men dıstrıbıýtorlar arasyndaǵy ózara is-qımyldyń biryńǵaı qaǵıdalarynyń bolmaýy. Fılmderdi kórsetý quqyǵyn berý sharttary kınoteatrlardyń repertýaryn qalyptastyrýyna jáne kórermenderdiń jańa fılmderge qol jetkizýine tikeleı áser etedi.
Osyǵan baılanysty Agenttik kınoprokat salasynda ashyq ári barlyq qatysýshyǵa birdeı jaǵdaı qalyptastyrý úshin birqatar shara usyndy.
Atap aıtqanda, kınoprokat qyzmetin júzege asyrýdyń biryńǵaı qaǵıdalaryn ázirleý, dıstrıbıýtorlar men kınoteatrlar arasynda jasalatyn úlgilik shartty bekitý jáne naryqty monıtorıngteý tetikterin jetildirý usynyldy.
Agenttiktiń habarlaýynsha, bul sharalar kınoteatrlar men dıstrıbıýtorlardyń fılm kontentine teń dárejede qol jetkizýine múmkindik berip, olardyń arasyndaǵy ózara is-qımyldyń ashyqtyǵyn arttyrady. Sondaı-aq saladaǵy adal básekelestikti damytýǵa jaǵdaı jasaıdy.
Eske salaıyq, buǵan deıin Almatydaǵy kınoteatrlar jelisi prodıýserlerden zańsyz tólem talap etkenin jazǵanbyz.
