Eldegi kıik sany 4,6 mıllıonnan asty
AQTÓBE. KAZINFORM – Qazaq jerindegi kıik sany – 4 689 000. Bıyl Oral, Betpaqdala jáne Ústirt popýlıatsııalarynda da ósim tirkeldi.
Elimizde 7–25 sáýir aralyǵynda kıik sanaǵy ótti.
Sanaqty «Ohotzooprom» ÓB RMKK Qazaqstan bıoalýantúrliligin saqtaý qaýymdastyǵy, Orman sharýashylyǵy jáne janýarlar dúnıesi komıteti jáne onyń Batys Qazaqstan, Aqtóbe, Mańǵystaý, Qostanaı, Qaraǵandy, Aqmola, Abaı jáne Ulytaý oblystaryndaǵy aýmaqtyq ınspektsııalary birlese ótkizdi. Betpaqdala, Ústirt jáne Oral popýlıatsııalaryndaǵy sanaq áýeden júrgizildi.
- Áýe esebi Pavlodar, Qaraǵandy, Qostanaı, Aqmola, Aqtóbe, Batys Qazaqstan, Mańǵystaý oblystarynyń, sondaı-aq Ulytaý jáne Abaı oblystarynyń aýmaqtarynda júrgizildi. Aqbókenderdi áýeden esepke alý jumystaryna QR Ǵylym jáne joǵary bilim mınıstrligi Ǵylym komıteti zoologııa ınstıtýtynyń ǵylymı qyzmetkerleri, sondaı-aq «Bókeıorda», «Yrǵyz-Torǵaı», «Altyn Dala», «Qorǵaljyn» jáne «Ulytaý» erekshe qorǵalatyn tabıǵı aýmaqtarynyń ókilderi qatysty. Oral popýlıatsııasynyń sany 2 700 000 basqa jetip, ósim 17,4%-dy qurady. Betpaqdala popýlıatsııasyndaǵy kıik sany 1 870 000 bas bolyp, ósim 16,9% kórsetti. Al Ústirt popýlıatsııasynyń sany 119 000 basqa jetip, ósim 52,6%-dy qurady,- dep habarlady QR Ekologııa jáne tabıǵı resýrstar mınıstrliginiń baspasóz qyzmeti. Degenmen aqbókenniń sanyn dál anyqtaý múmkin emes. Kıiktiń qystan aman shyǵýyna jaıylymnyń jaı-kúıi áser etedi. Sonymen birge indet de kıik ólimine ákelip soǵýy múmkin.
Eske salsaq, Batys Qazaqstan jáne Pavlodarda sharýalar kıik sanyn retteýdi surady. Byltyr kıik eti satýǵa shyǵarylǵanymen, suranys kóp bolmady.
