Eldegi qaı qalada shıpajaıda demalý arzan
QARAǴANDY. KAZINFORM — Qazaqstanda shıpajaıda emdelý men tynyǵýdyń quny qalaǵa jáne tańdalǵan mekemege qaraı aıtarlyqtaı ózgeredi. Bir qalanyń ózinde qaltaǵa qonymdy usynystarmen qatar, qymbat kýrorttarmen básekelesetin shıpajaılar da bar.
Usynylǵan qalalar arasynda shıpajaıdaǵy bir táýliktiń eń joǵary quny Almatyda tirkelgen — 200 myń teńgege deıin. Astana men Qonaevta bul kórsetkish 180 myń teńgege jetedi. Alaıda osy eki qaladaǵy eń tómengi baǵa birdeı emes: elordada shıpajaıda emdelý men tynyǵý 12 myń teńgeden bastalsa, Qonaevta 10 myń teńgeden bastalady.
Táýligine 10 myń teńgeden bastalatyn eń qoljetimdi usynystar Qaraǵandy, Qostanaı jáne Qonaev qalalarynda bar. Degenmen baǵanyń joǵarǵy shegi bul qalalarda ártúrli: Qaraǵandyda 98 myń teńgege, Qostanaıda 96 myń teńgege, al Qonaevta 180 myń teńgege deıin jetedi. Bul bastapqy baǵasy tómen shıpajaılardyń bári birdeı arzan degendi bildirmeıdi. Tańdaý aıasy keńeıgen saıyn qyzmet quny da edáýir ósýi múmkin.
Almatyda shıpajaıda bir táýlik tynyǵý men emdelý quny 20 myńnan 200 myń teńgege deıin barady. Bul — salystyrylyp otyrǵan qalalar arasyndaǵy eń joǵary shekti baǵa. Astanada táýliktik qun 12 myńnan 180 myń teńgege deıin, al Qonaevta 10 myńnan 180 myń teńgege deıin ózgeredi. Atalǵan úsh qalada eń tómengi jáne eń joǵary baǵanyń arasy edáýir alshaq.
Kókshetaýda shıpajaıda bir táýlik emdelip, tynyǵý quny 20 myńnan 125 myń teńgege deıin jetedi. Qaraǵandyda baǵa 10 myńnan 98 myń teńgege deıin, Qostanaıda 10 myńnan 96 myń teńgege deıin, al Túrkistanda 20 myńnan 95 myń teńgege deıin ózgeredi. Pavlodarda bir táýliktiń quny 22,5 myń teńgeden bastalyp, 68 myń teńgege deıin barady.
Baǵa aıyrmashylyǵy salystyrmaly túrde tómen qalalarda shıpajaı qyzmetteriniń quny da bir-birine jaqyn. Oralda bir táýlik tynyǵý men emdelý 25 myńnan 35 myń teńgege deıin tursa, Taldyqorǵanda 22 myńnan 30 myń teńgege deıin jetedi. Aqtaý men Tarazda baǵa 17,5 myńnan 25 myń teńgege deıin ózgeredi. Jezqazǵanda shıpajaıda bir táýlik bolý quny 15 myńnan 25 myń teńgege deıin bolsa, Shymkentte 17 myńnan 25 myń teńge aralyǵynda.
Atyraýda shıpajaıdaǵy bir táýliktiń quny 18,5 myńnan 42 myń teńgege deıin jetedi. Aqtóbe men Óskemende bul kórsetkish 20 myńnan 50 myń teńgege deıin ózgeredi. Semeıde baǵa 18 myńnan 47 myń teńgege deıin, Petropavlda 17,5 myńnan 30 myń teńgege deıin bolsa, Qyzylordada 25 myńnan 50 myń teńgege deıin barady.
Osylaısha, usynylǵan qalalar arasynda shıpajaıda bir táýlik tynyǵý men emdelýdiń eń tómengi baǵasy Qaraǵandyda, Qostanaıda jáne Qonaevta tirkelgen. Al eń joǵary baǵa Almatyda, Astanada jáne Qonaevta usynylady. Degenmen shıpajaı tańdaǵanda tek joldama qunyna qarap sheshim qabyldaý jetkiliksiz. Baǵaǵa turý, tamaqtaný, emdik-saýyqtyrý protsedýralary men qosymsha qyzmetterdiń qaısysy kiretinin de naqtylaǵan jón.
Buǵan deıin elimizde shıpajaıda emdelýge memleket tarapynan qandaı qoldaý kórsetiletini týraly jazǵanbyz.
