Eldegi qarjy naryǵynyń ınfraqurylymyna qatysty ózgeris bolady
ASTANA. KAZINFORM — Parlament Májilisi «Reıtıngtik qyzmet týraly» zań jobasy men oǵan ilespe qujatty talqylaıdy.
Atalǵan zań jobalary Májiliske 2025 jylǵy 28 qarashada Úkimet qaýlysymen engizildi.
- Bul qujattar qarjy naryǵynyń ınfraqurylymyn ary qaraı damytý maqsatynda ázirlendi. Qazirgi kezde Qazaqstanda ulttyq reıtıngilik agenttikterdi damytý úshin quqyqtyq jáne ınstıtýtsıonaldyq tetikter qarastyrylmaǵan. Osy oraıda zań jobalary aıasynda tıisti jaǵdaı jasaýdyń zańnamalyq negizi qurylady. Bul qujattarda reıtıngilik qyzmettiń negizgi prıntsıpteri, kredıttik reıtıngilik agenttikterdiń qyzmetine talaptar bekitiledi, sondaı-aq ókiletti organ tarapynan olardy retteý men baqylaýdyń rejımin aıqyndaý eskerilgen, - dedi depýtat Tatıana Saveleva Májilistiń jalpy otyrysynda.
Onyń aıtýynsha, zań jobalarynda qarastyrylǵan qadamdar qarjy uıymdarynyń ashyqtyǵyn arttyrý men olarǵa degen senimdi kóterýge, táýelsiz baǵalaý agenttikteri jumysynyń tıimdiligin jaqsartýǵa baǵyttalǵan.
- Bul is-sharalar reıtıngi joǵary bıznes sýbektilerine ınvestorlar úshin tartymdy bolýǵa, olardyń bedelin nyǵaıtýǵa jáne ekonomıkaǵa qarajat bólýdi arttyrýǵa yqpal etedi. Sondyqtan Májilistiń Qarjy jáne bıýdjet komıteti osy zań jobalary boıynsha qorytyndy ázirleýge daıyn, - dedi depýtat.
Eske salsaq, Qazaqstandyq qarjy uıymdary halyqaralyq tólem standartyna kóshti.