Eldegi káriz jelileriniń jartysynan astamy tozǵan
ASTANA. KAZINFORM — Qazaqstanda káriz jelileriniń 54%-y tozǵan. Al sarqyndy sý tazartý qurylystarynyń tozý deńgeıi 65%-dan asady. Bul máseleni sheshý úshin 45 qalada tazartý nysandary salynyp, jańartylady.
Sonymen qatar 7,8 myń shaqyrym sý qubyry men káriz jelisi jóndeledi. Jumystarǵa shamamen 1,9 trln teńge qarastyrylǵan.
Bul týraly Ortalyq kommýnıkatsııalar qyzmetinde ótken brıfıngte QR Ónerkásip jáne qurylys mınıstrliginiń ókilderi málimdedi.
Qazaqstandaǵy sý qubyry jelileriniń uzyndyǵy — 111 myń shaqyrym. Onyń 38%-y tozǵan. Al uzyndyǵy 18 myń shaqyrym bolatyn káriz jelileriniń tozý deńgeıi 54%-ǵa jetken. 2029 jylǵa qaraı bul kórsetkishterdi tıisinshe 33% jáne 41%-ǵa deıin tómendetý josparlanǵan.
— Sý qubyry jelilerin jańartýǵa 700 mlrd teńge, káriz júıesin jóndeýge 400 mlrd teńge bólinedi. Bıyl jyl sońyna deıin sý qubyrlarynyń tozýyn 37%-ǵa, káriz jelilerinikin 52%-ǵa deıin azaıtý kózdelgen, — dedi QR Ónerkásip jáne qurylys mınıstrligi Qurylys jáne turǵyn úı-kommýnaldyq sharýashylyq isteri komıtetiniń tóraǵasy Baqytjan Júnisbekov.
Qazir jalpy quny 356 mlrd teńge bolatyn 146 joba iske asyrýdyń ártúrli kezeńinde tur. Onyń 95-i sý qubyry jelilerin, 51-i káriz ınfraqurylymyn jańartýǵa baǵyttalǵan.
— Qazirgi ýaqytta 69 joba iske asyrylyp jatyr, 23 joba konkýrstyq rásimderge daıyndalyp, taǵy 54 joba kelisý kezeńinde, — dedi ol.
Alaıda eski qubyrlardy aýystyrý jetkiliksiz. Sarqyndy sýdy tazartatyn nysandardyń da jaǵdaıy kúrdeli. Elimizdegi tazartý qurylystarynyń tozýy 65%-dan asady. Sondyqtan 45 qalada jańa nysandar salynyp, qoldanystaǵylary rekonstrýktsııalanady. Bul jumystarǵa 800 mlrd teńge qarastyrylǵan.
— Bizdiń mindetimiz — jekelegen ýchaskelerdi ǵana emes, sýmen jabdyqtaý jáne sý burý júıesin keshendi túrde jańartý. Eger sarqyndy sý kelip túsetin tazartý qurylystary tozǵan jabdyqtarmen jumys isteı berse, qubyrlardy aýystyrýdyń ózi jetkiliksiz. Sondyqtan jańǵyrtý sý qubyry jelilerin, káriz júıelerin jáne tazartý nysandaryn túgel qamtıdy, — dedi QR Ónerkásip jáne qurylys mınıstrligi Qurylys jáne turǵyn úı-kommýnaldyq sharýashylyq isteri komıtetiniń tóraǵasy.
Onyń aıtýynsha, jańǵyrtýdyń maqsaty — turǵyndardy senimdi kommýnaldyq qyzmettermen qamtamasyz etip, zamanaýı ınfraqurylym qalyptastyrý.
Aıta keteıik, Almatyda qaıtarylǵan aktıvter esebinen 49,3 km sý jáne káriz jelisi jańartyldy.
