Eldegi ıt-mysyqty esepke alý máselesin tolyq sheshý kerek — senator
ASTANA. KAZINFORM — Iesiz ıtterdi aýlaýǵa qatysty erejeni jergilikti máslıhattar ózderi aıqyndaıdy. Bul týraly senator Arman Óteǵulov málim etti.
Onyń aıtýynsha, búginde tirkelgen janýarlar men tirkeýmen qamtylmaǵandardyń sany belgisiz.
— Eń mańyzdysy, janýarlardyń ıelerine qatysty jaýapkershilik, ıaǵnı osyndaı talap mindetti túrde bolýy kerek. Birinshi kezekte ıt pen mysyqtardyń sany boıynsha esepke alý is-sharasyn júrgizip alý qajet. Bazada eldegi ıtterdiń tolyq sany boıynsha esep turýy tıis. Barlyǵy tirkeýde tursa, sodan keıin buralqy ıtter de bolmaıdy, — dedi Arman Óteǵulov Senatta tilshiler suraǵyna jaýap bere otyryp.
Onyń paıymynsha, esepke alý jumystary rettelgennen keıin, kúshik asyrap alýshylardyń jaýapkershiligi máselesi sheshiledi.
Sonymen qatar ol Senat engizgen túzetýler aıasynda ıesiz ıtterdi aýlaý tártibin jergilikti máslıhattardyń sheshimderi aıasynda retteletinin aıtty. Bul erejeni talqylaý kezinde qoǵamdyq uıymdardyń pikiri eskeriledi.
Aıta keteıik, búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine janýarlarǵa jaýapkershilikpen qaraý máseleleri boıynsha ózgerister men tolyqtyrýlar engizý týraly» Zańy qaraldy. Senatorlar qujattyń jekelegen baptaryn jańa redaktsııada usynyp, ony Májiliske qaıtardy.
Senatorlar engizgen túzetý aıasynda ıesiz janýarlar sanyn retteý kezinde «evtanazııa» termınin qoldanýdan bas tartý usynyldy.
Sonymen qatar, keń qoǵamdyq talqylaýǵa túsken 5 táýlik merzimin qoldanýdan da bas tartý qarastyryldy. Iesiz janýarlar sanyn retteýdiń naqty tártibi men merzimderin ár óńirdiń máslıhattaryna derbes aıqyndaý usynyldy.
