Eldegi ınjenerlik jelilerdiń teń jartysy tozǵan – Mınıstr

ASTANA. KAZINFORM – Ótken jyldyń jylytý maýsymynda jylý jelilerinde 53, sý jáne káriz jelilerinde – 264 tehnologııalyq buzýshylyq tirkeldi. Olardyń basym bóligi Abaı, Aqmola, Shyǵys Qazaqstan, Qaraǵandy oblystarynda jáne Astana qalasynda. Bul týraly Ónerkásip jáne qurylys mınıstri Ersaıyn Naǵaspaev aıtty.

Mınıstrdiń aıtýynsha, jyl saıyn jylý jáne sý jabdyqtary men sý burý júıeleriniń tozýyna baılanysty tehnologııalyq apat týyndaý qaýpi bar. Jalpy, elimiz boıynsha shamamen 137 myń shaqyrym ınjenerlik jeli bar. Olardyń ortasha tozý deńgeıi – 49% bolsa, 67 myń shaqyrymy aýystyrýdy qajet etedi.

Ásirese, tozǵan ınjenerlik jelilerdiń kópshiligi Pavlodar, Qaraǵandy, Abaı, Shyǵys Qazaqstan, Ulytaý jáne Soltústik Qazaqstan oblystarynda tirkelgen.

− Bıyl respýblıkalyq bıýdjetten sýmen jabdyqtaý obektilerin salý men qaıta jańartý úshin 176 mıllıard teńge qarastyryldy. Jalpy Prezıdent tapsyrmasyna sáıkes, 2030 jylǵa deıin tozǵan ınjenerlik jelilerdi 40% deıin tómendetý josparlanǵan. Osy tapsyrmany oryndaý úshin «Energetıka jáne kommýnaldyq sektorlardy jańǵyrtý» ulttyq jobasy qabyldandy. Onda shamamen 1 trıllıon teńgege 8 myń shaqyrym sý jáne sý burý jelilerin jańǵyrtý josparlanýda, − dedi sala mınıstri Úkimettiń búgingi otyrysynda.

Buǵn deıin E. Naǵaspaev elimizde 110 mıllıon tonna kómir óndirilgenin, onyń 30 mıllıon tonnasy eksportqa shyǵarylǵanyn aıtqan edi.