Eldegi ınflıatsııa teńge men dollar baǵamyna qalaı áser etti – KASE jaýaby

ALMATY. KAZINFORM – Qazaqstan qor bırjasynyń (KASE) basqarma tóraǵasy Ádil Muhamedjanov bıyl ınflıatsııanyń ósýine áser etken negizgi sebepterdi atady.

Resmı málimetke sáıkes, 2025 jyldyń 9 aıynyń qorytyndysy boıynsha Qazaqstandaǵy ınflıatsııa 12,9%-ǵa jetti.

- Baǵanyń ósýine eń aldymen, azyq-túlik pen sýsyndardyń, sondaı-aq densaýlyq saqtaý salasynda baǵanyń kóterilýi áser etti. Inflıatsııany tómendetý úshin Ulttyq bank bazalyq mólsherlemeni 18 paıyzǵa deıin, ıaǵnı 150 bazıstik tarmaqqa kóterý týraly sheshim qabyldady. Onyń aldyndaǵy ózgeris bıyl naýryz aıynda bolǵan edi, ol kezde mólsherleme 16,5% deńgeıinde belgilengen bolatyn. Sondaı-aq ınflıatsııanyń negizgi qozǵaýshy kúshteriniń biri – janarmaı baǵasynyń ósýi, ol shamamen 12%-ǵa qymbattady. Tek qyrkúıek aıynyń ózinde janarmaı baǵasy 3,4%-ǵa ósti. Halyqaralyq naryqqa toqtalsaq, ózge elder aqsha-nesıe saıasatyn saq saıasat ustanyp otyr. Degenmen keıbir ortalyq bankter aqsha-nesıe saıasatyn jumsartý men mólsherlemeni tómendetýge kóshti, – dedi Ádil Muhamedjanov.

Onyń aıtýynsha, teńge baǵamyna el ishindegi ınflıatsııa ǵana emes, basqa da sebepter áser etip keledi. Onyń ishinde altyn men mys fıýchersteriniń 47% jáne 20%-ǵa ósýi, sondaı-aq Brent jáne WT markaly munaı baǵasynyń 10% jáne 13%-ǵa tómendeýi bar.

- Valıýtalar baǵamyna kelsek, osy jyldyń 9 aıynda qazaqstandyq teńge 4,7%-ǵa álsiredi. Sonymen qatar Brent markaly munaıy shamamen 10–20%-ǵa arzandady. Al rýbl, kerisinshe, teńgege qatysty 42%-ǵa, dollarǵa qatysty 27%-ǵa nyǵaıdy, – dedi KASE basqarma tóraǵasy.

Degenmen Ádil Muhamedjanov aldaǵy kezeńge qatysty oń boljam bar ekenin atap ótti.

- Jalpy alǵanda Qazaqstan ekonomıkasy boıynsha boljamdar oń sıpatta qala beredi. Alaıda ınflıatsııalyq táýekel saqtalyp otyr, – dedi ol.

Eske salaıyq, 2025 jyldyń 9 aıynyń qorytyndysy boıynsha teńgeniń AQSh dollarymen ortasha baǵamy – 548,97 teńge boldy.

Buǵan deıin Ulttyq bank bazalyq mólsherlemeni 18%-ǵa deıin kóterdi.