Eldegi ınflıatsııa 0,9% jetti: uıaly baılanys qyzmeti 5% ósken

ASTANA. KAZINFORM – 2024 jylǵy qazanda aılyq ınflıatsııa deńgeıi údeı túsip, 0,9% qurady (aǵymdaǵy jylǵy qyrkúıekte – 0,4%). Aqyly qyzmetterdiń baǵasy – 1,4%, azyq-túlik emes taýarlardyń baǵasy – 1%, azyq-túlik taýarlary 0,4% joǵarylady. Bul jaıynda ulttyq statbıýrodan habarlandy.

Turǵyn úı-kommýnaldyq qyzmetter salasynda tarıfter sýyq sýǵa – 25%, sý burýǵa – 5,3%, turǵyn úıdi kútip ustaýǵa – 1%, elektr energııasyna, ystyq sýǵa 0,6%-dan joǵarylady. Temirjolmen jolaýshylaý qyzmeti – 13%, uıaly baılanys qyzmeti 5% qymbattady.

Azyq-túlikke jatpaıtyn taýarlar ishinde qazan aıynda otyn baǵasy ósti – 4,7%, tas kómir – 1,1%. Turmystyq tehnıka – 2,6%, kıim men aıaq-kıim – 0,9%, qurylys materıaldary men jeke paıdalanylatyn taýarlar 0,4%-dan qymbattady.

Azyq-túlikten qııar baǵasy 9,7%, qyzanaq – 8,6% , lımon – 7%, apelsın – 6,7%, tuz – 6,5%, jumyrtqa – 3,2%, kúnbaǵys maıy 2,4% ósti. Baǵanyń tómendeýi sábizge – 10%, júzimge – 5,7%, almaǵa – 3,4%, qyzylshaǵa – 3,2%, pııazǵa – 2,8%, kartopqa 2,1% baıqaldy.

Óńirlerdiń ishinde eń joǵary aılyq ınflıatsııa Almaty qalasynda – 1,7% (ortasha respýblıkalyq deńgeıden 0,8 p.t. joǵary), eń tómengi – Pavlodar oblysynda jáne Astana qalasynda 0,4%-dan tirkeldi.

Óńirler bólinisinde eń joǵary azyq-túlik taýarlarynyń baǵalary Almaty oblysynda – 0,8%, azyq-túlik emes taýarlaryna – Ulytaý, Abaı oblystarynda 1,7%-dan, aqyly qyzmetterge – Almaty qalasynda 3,6% ósti.