Eldegi geologııalyq zertteýde qandaı jetistikter bar
ASTANA. KAZINFORM — Taıaý arada iri ken oryndary ashyla ma? Bul suraqqa Ónerkásip jáne qurylys mınıstrligi jaýap berdi.
- Memleket basshysynyń geologııalyq-geofızıkalyq zerdeleý alańyn 2026 jylǵa deıin 2,2 mln sharshy shaqyrymǵa deıin jetkizý jónindegi tapsyrmasyn iske asyrý maqsatynda memlekettik bıýdjet qarajaty esebinen 1:200 000 masshtabta jer qoınaýyn memlekettik geologııalyq zertteý jónindegi óńirlik jumystar oryndalyp jatyr. 2025 jylǵy jumystardyń nátıjesi boıynsha «El aýmaǵyn geologııalyq-geofızıkalyq zertteýmen qamtý» kórsetkishi 2038,2 myń sharshy shaqyrym qurady. Aldaǵy ýaqytta qatty paıdaly qazbalarǵa izdeý jumystaryn júrgizýge 29 perspektıvaly alań anyqtaldy. 2026 jyly el aýmaǵyn geologııalyq-geofızıkalyq zerdeleýdi arttyrý jónindegi jobalar jalǵasady. Jalpy qamtý aýmaǵy 2,2 mln sharshy shaqyrymǵa qol jetkizýdi qamtamasyz etýge múmkindik beretin 47 nysanda jumystardy aıaqtaý josparlanǵan, - delingen mınıstrliktiń Kazinform agenttigine bergen jaýabynda.
Sonymen qatar, geologııa salasyndaǵy basym mindet - 1:200000 masshtabtaǵy geologııalyq zertteýlerdi aıaqtap, egjeı-tegjeı 1:50000 masshtabty geologııalyq zertteýlerge kóshý.
- 2026-2028 jyldar kezeńinde 100 myń sharshy shaqyrym alańda 1:50000 masshtabty geologııalyq túsirilim júrgizý josparlanǵan. Bul 1:50000 masshtabqa kóshý tásili perspektıvaly ýchaskelerdi erte anyqtaýǵa, ınvestıtsııalyq tartymdylyqty arttyrýǵa jáne halyqaralyq standarttaǵy geologııalyq aqparat alýǵa múmkindik beredi. Jobalarda geologııalyq kartaǵa túsirý boıynsha, onyń ishinde qazirgi zamanǵy zertteý ádisteri, zerthanalyq súıemeldeý, jer qoınaýyn zertteýdiń jerústi ádisterin (topografııa, burǵylaý) qamtıtyn jumystardyń tolyq kesheni eskerilgen, - dep atalyp ótken vedomstvo aqparatynda.
Aıta keteıik, geologııalyq barlaý jumystaryn júrgizýge 40,7 mlrd teńgeden astam qarajat bólinetini málim boldy.
Memleket basshysynyń tapsyrmasyna sáıkes, 2026 jyldyń sońyna qaraı el aýmaǵyn 2,2 mln sharshy shaqyrymǵa deıin geologııalyq-geofızıkalyq zerdeleýdi qamtýǵa qol jetkizý josparlanǵan.