Eldegi energııanyń úshten birine jýyǵyn on iri kásiporyn tutynady
ASTANA. KAZINFORM — Qazaqstandaǵy energııany eń kóp tutynatyn on kásiporynnyń úlesine eldegi jalpy energııa tutynýdyń shamamen 30%-y tıesili. Bul týraly QR Ónerkásip jáne qurylys mınıstrligi Ónerkásip komıteti tóraǵasynyń orynbasary Oljas Álibekov Ortalyq kommýnıkatsııalar qyzmetinde ótken baspasóz májilisinde aıtty.
Onyń aıtýynsha, 2025 jyly energııany eń kóp tutynatyn on kásiporyn jıyntyq eseppen 34 mıllıon tonna shartty otyn tutynǵan.
— On iri tutynýshynyń úlesine eldegi jalpy energııa tutynýdyń shamamen 30%-y tıesili. Sondyqtan iri tutynýshylarmen jumys isteý ekonomıkanyń jalpy energııa syıymdylyǵyn tómendetýdiń negizgi tetikteriniń biri sanalady. Іri tutynýshylar arasynda energetıka salasynyń úlesi — 44,7%, ónerkásiptiń úlesi — 42,4%, al munaı-gaz salasynyń úlesi — 12,9%, — dedi spıker.
Qazir energııany kóp tutynatyn kásiporyndar Memlekettik energetıkalyq tizilim arqyly baqylanady. Tizilimge jalpy 22 myńnan astam kásiporyn men uıym engizilgen. Onyń ishinde jylyna keminde 50 myń tonna shartty otyn tutynatyn iri kásiporyndar úshin energııa tıimdiliginiń nysanaly kórsetkishteri belgilengen.
Sondaı-aq energııany eń kóp tutynatyn 106 kásiporynnyń 53-i ónerkásip salasyna tıesili. Onyń 30-y óńdeý ónerkásibinde, 23-i taý-ken metallýrgııa kesheninde jumys isteıdi.
— On iri tutynýshy energııa únemdeý jónindegi josparlanǵan sharalardy iske asyrsa, 1,6 mıllıon tonnadan astam shartty otyndy únemdeýge múmkindik bar. Bul sharalar tolyq júzege asqan jaǵdaıda Qazaqstan ekonomıkasynyń energııa syıymdylyǵy 1,5%-ǵa tómendeýi múmkin, — dedi Oljas Álibekov.
Aıta keteıik, buǵan deıin Qazaqstan 2029 jylǵa qaraı ekonomıkanyń energııa syıymdylyǵyn 10%-ǵa tómendetýdi josparlaǵany habarlandy.
