Eldegi eńbek naryǵy ózgeredi: 10 jylda 14 kásip joıylady

ASTANA. KAZINFORM — Eńbek naryǵynyń 44 paıyzy jasandy ıntellektiniń yqpalymen ózgeredi. Bul týraly Májilis tóraǵasynyń orynbasary Danııa Espaeva málim etti. 

— Eńbek mınıstrliginiń málimetinshe, 2035 jylǵa qaraı Qazaqstanda 562 kásip nemese eńbek naryǵynyń 44%-y (shamamen 4 mln adam) jasandy ıntellektiniń yqpalymen ózgeredi, 46 kásip (362 myń adam, 4%) qysqarady, al 14 kásip (49 myń adam) múldem joǵalady. Sonymen qatar, jasandy ıntellekt pen ekonomıka salalarynyń qıylysynda jańa mamandyqtar qalyptasýda, olarǵa suranys aldaǵy jyldary óse bastaıdy. Ekonomıkanyń negizgi salalaryna jasandy ıntellektini jedel engizý joǵary bilim berý júıesinen tsıfrlandyrý jáne avtomattandyrý jaǵdaılary úshin mamandar daıarlaý qabiletin talap etedi, — dedi Danııa Espaeva Parlament Májilisinde joǵary bilimdi kadrlardy daıarlaý taqyrybyna arnalǵan Úkimet saǵatynda.

Onyń aıtýynsha, osy maqsatta joǵary bilimniń qoljetimdiligi aıtarlyqtaı keńeıtilip, memlekettik qoldaý kúsheıtildi. Atap aıtqanda:

— sońǵy bes jyl ishinde bul salaǵa bólinetin qarjy kólemi 246 mlrd teńgeden 472 mlrd teńgege deıin artty.

— jyl saıyn memlekettik bilim berý granttarynyń sany artyp keledi, bıyl olardyń sany 77 myń boldy (onyń ishinde 18,8 myńy — ınjenerlik baǵyttar boıynsha);

— stıpendııa mólsheri kezeń-kezeńimen ulǵaıtylyp, keıingi bes jylda shamamen 2 esege ósti.

Budan buryn habarlanǵandaı, Eńbek jáne halyqty áleýmettik qorǵaý mınıstrligi aldaǵy ýaqytta jasandy ıntellekt elimizde qaı mamandyqtarǵa erekshe áser etetini jaıynda túsinik berdi.