Eldegi eki memlekettik arhıvke ulttyq mártebe berildi
ASTANA. KAZINFORM — Qazaqstan Respýblıkasynyń Ulttyq arhıvi men Ortalyq memlekettik arhıvine «Ulttyq» mártebesi berildi. Tıisti Jarlyqqa Prezıdent Qasym-Jomart Toqaev qol qoıdy. Qujat 2027 jylǵy 1 qańtardan bastap kúshine enedi.
Jańa mártebe arhıvterdiń Qazaqstannyń tarıhı-mádenı murasyn saqtaýdaǵy mańyzyn aıqyndaıdy. Sondaı-aq qujattardy saqtaý, olardyń qoljetimdiligin qamtamasyz etý, arhıv qorlaryn tsıfrlandyrý jáne tarıhı derekterdi ǵylymı aınalymǵa engizý baǵytyndaǵy rólin kórsetedi.
Qazaqstan Respýblıkasynyń Ortalyq memlekettik arhıvi 1921 jyly qurylǵan. Onda elimizdiń ár kezeńdegi tarıhyna, qazaq memlekettiliginiń qalyptasýyna, ulttyq mádenıet pen ǵylymnyń damýyna qatysty biregeı qujattar saqtalǵan. Arhıv qorynda kórnekti tulǵalardyń ómiri men qyzmetine qatysty qundy derekter de bar. Búginde mekemeniń 2 309 qorynda 1,3 mıllıonnan astam saqtaý birligi jınaqtalǵan.
Al Qazaqstan Respýblıkasynyń Ulttyq arhıvi 2006 jyly qurylǵan. Mekeme elimizdiń saıası, áleýmettik-ekonomıkalyq jáne mádenı damý tarıhyna qatysty qujattardy jınaqtaý, saqtaý jáne paıdalanýdy qamtamasyz etedi. Arhıv materıaldary memlekettik organdarǵa, zertteýshiler men azamattarǵa qoljetimdi.
Qazir Ulttyq arhıvtiń 311 qorynda 405 589 saqtaý birligi bar. Sonymen qatar mekeme 278 memlekettik organmen jáne uıymmen baılanys ornatyp, olardyń arhıv qujattaryn qabyldaý jáne saqtaý jumysyn júrgizedi.
