Eldegi dıqandardyń 12 paıyzy gektaryna 7-8 tsentnerden ǵana ónim alǵan

ASTANA. KAZINFORM – Aýyl sharýashylyǵy mınıstri Aıdarbek Saparov Úkimet otyrysynda eldegi dıqandardyń egin jınaý kórsetkishi áli de bolsa ala-qula ekenin málim etti.

- Negizgi astyq óndirýshi óńirlerde júrgizilgen taldaý agrotehnologııalardy saqtaý men ónimdilik arasynda tikeleı baılanys bar ekenin kórsetti. Mysaly, barlyq sharýashylyqtyń shamamen 60%-y gektarynan 15–30 tsentner ónim alsa, al 8%-y 30 tsentnerden asa ónim jınady. Osylaısha, respýblıka boıynsha ortasha ónimdilik gektarynan 17 tsentner deńgeıinde qalyptasyp, ótken jylmen salystyrǵanda 5%-ǵa joǵary boldy. Degenmen sharýashylyqtardyń shamamen 12-paıyzynda ónimdilik áli de tómen deńgeıde qalyp otyr. Ár gektardan 7-8 tsentner ónim ǵana alǵan, - dedi ol.

Aıdarbek Saparov bul sharýashylyqtar agrotehnologııany joǵary deńgeıde qoldanbasa kóshten qala beretinin aıtady.

- Osyǵan baılanysty ákimdikter 2028 jylǵa deıin aýyl sharýashylyǵy jalpy ónimin eki eseleý jónindegi Jol kartasynyń kórsetkishterine jetý úshin fermerlerdi tehnologııany saqtaýǵa yntalandyrý jumystaryn kúsheıtýi tıis, - dedi vedomstvo basshysy.

Aıta keteıik, Úkimet búgin egin jınaý naýqanyn qorytyndylap, sporttyq ınfraqurylymdy damytý máselesin pysyqtap jatyr.