Eldegi bankterge «ıslam terezesin» ashýǵa ruqsat beretin zań jobasy tamyzda Parlamentke túsedi
ASTANA. KAZINFORM – Qazaqstannyń bank júıesindegi ıslam bankteriniń jıyntyq úlesi 0,4 paıyz ǵana. Qarjy naryǵyn damytý jáne retteý agenttigi basqarma tóraǵasynyń orynbasary Nurlan Ábdrahmanov Senatta ótken Úkimet saǵatynda osyndaı derek keltirdi.
- Búgingi tańda elimizde ıslam bankterin ashyp, jumys isteýge zańnamada jaǵdaı jasalǵan. Biraq ókinishke qaraı, olardyń búkil bankter aktıvinde úlesi tómen ekenin aıtýǵa májbúrmin. Bizde eki ıslam banki bar – Al Hilal Bank jáne Zaman Bank. Olardyń búkil bankter júıesiniń aktıvindegi úlesi 0,4 paıyz ǵana. Bul quraldy damytý úshin ne isteý kerek? Tipti ıslam memleketteriniń ózinde ıslam qarjysy dástúrli bank bıznesimen parallelde jumys isteıdi. Osyǵan baılanysty Memleket basshysynyń tapsyrmasymen Bank isi jáne qyzmeti týraly jańa jań ázirlep jatyrmyz. Osy tamyz aıyna qaraı Parlament qaraýyna túsýi kerek. Osy qujatta dástúrli bankterden «ıslam terezesin» ashýǵa múmkindik beretin normalar usynyp otyrmyz, - dedi ol senatorlardyń suraǵyna jaýap bere otyryp.
Aıtýynsha, bul norma Qazaqstannyń jergilikti kommertsııalyq bankterine paıyzdyq nesıe de, ıslam sharty boıynsha paıyzsyz nesıe de berýge múmkindik ashady.
- Bul ıslam shartymen qarjylandyrýdyń aýqymyn keńeıtedi. Ekinshi jaǵynan biz elimizge ıslam bankteriniń kóbirek kelýin kútip otyrmyz. Óıtkeni jańa zań ıslam shartymen jumys isteıtin qarjy ınstıtýttarynyń elde bólimshelerin ashyp, jumys isteýine jaǵdaı jasaıdy, - dedi agenttik tóraǵasynyń orynbasary.
Eske salsaq, 2024 jyldyń aıaǵynda «Otbasy bank» «paıyzsyz» ıpotekaǵa Islam bankteriniń qarjysyn tartýy múmkin ekeni aıtylǵan edi.