Eldegi alıment boryshy 18 mlrd teńgege jetken
ASTANA. KAZINFORM — 2024 jyly alıment boryshy boıynsha qozǵalǵan sot isteriniń sany 12 myńnan asyp, balalar aldyndaǵy bereshek 17 mlrd teńgege jetken.
— Alıment óndirip alýǵa qatysty áleýmettik mańyzdy ister sanatyna erekshe nazar aýdarý kerek. Sebebi, 2024 jyldyń qorytyndysy boıynsha osy saladaǵy problemaly is júrgizý sany 12 myńnan asyp, balalar aldyndaǵy bereshegi shamamen 17 mlrd teńgege jetken, — dedi Májilis tóraǵasynyń orynbasary Dánııa Espaeva Úkimet saǵatynda.
Al depýtat Snejanna Imasheva bul soma bıyl 18 mlrd teńgege jetkenin aıtty.
Dánııa Espaevanyń sózinshe, sot oryndaýshylarynyń jumysyna shaǵymdardyń sany azaımaı otyr.
— Turǵyndar kóbinese sot oryndaýshysynyń áreketsizdigine, quqyqtarynyń buzylatynyna, tıesili qarajattyń ýaqytynda aýdarylmaıtynyna narazy. Ádilet mınıstrliginiń derekteri boıynsha ótken jyldyń ózinde shaǵymdar sany 2 esege artyp, 89 myńnan asqan. Sonymen qatar sońǵy eki jylda sottarǵa berilgen shaǵymdardyń sany 17 myńǵa jetken. Mundaı shaǵymdar depýtattardyń atyna da kóp keledi, — dedi ol.
Ádilet mınıstrliginiń deregi boıynsha, elimizde 272 myń erkek, 11 myń áıel balasyna alıment tóleýden jaltaryp júr.