Eldegi alǵashqy AES ataýyna qatysty 20 myńnan astam usynys joldandy

ASTANA. KAZINFORM — Qazaqstan halqy alǵashqy atom elektr stansasynyń ataýyna qatysty 20 myńnan astam usynys joldady. Bul týraly Atom energııasy jónindegi agenttiginiń tóraǵasy Almasadam Sátqalıev málim etti. 

— Naqtyraq aıtsaq, qazirdiń ózinde 20 myńnan astam ótinish kelip túsken. Halyqtyń bul baıqaýǵa qatysýǵa degen qyzyǵýshylyǵy joǵary. Biz aldyn ala taldaý jasadyq. Eń kóp taralǵan usynystardyń negizinen úsh toptama bar, — dedi Almasadam Sátqalıev Parlament Májilisindegi baspasóz máslıhatynda.

Onyń aıtýynsha, usynystardyń birinshi toptamasy geografııalyq ornalasýǵa qatysty.

— Bul rette Balqash, Іle nemese Úlken degen ataýlar. Moıynqum, Moıynqum atom elektr stantsııasy atty usynystar da bar, — dedi agenttik basshysy.

Budan bólek, Qazaqstan halqy usynǵan ataýlardyń ekinshi toptamasy Qazaqstandaǵy eleýli tarıhı, saıası jáne ǵylymı qaıratkerlerdiń esimderin qamtıdy.

— Stantsııaǵa akademık Shókınniń, Batýrovtyń, Qanysh Sátbaevtyń, sondaı-aq Abaıdyń esimin berý týraly usynys bar, — dedi ol.

Úshinshi blok tehnıkalyq jáne energetıkalyq taqyryptarǵa qatysty.

— Bul turǵyda jaryq, qýat, beıbit atom, energııa sııaqty negizgi sózderdi qoldanatyn ártúrli ataýlar, — dep túsindirdi Sátqalıev.

Agenttik basshysy barlyq usynysty etnograftar, tarıhshylar, ýran salasynyń ókilderi, blogerler, qoǵamdyq pikir kóshbasshylary kiretin arnaıy komıssııa saraptap jatqanyn aıtty.

Eske salsaq, 25 qyrkúıek kúni saǵat 12:00–de Qazaqstanda alǵashqy atom elektr stantsııasyna úzdik ataý berý boıynsha jalpyhalyqtyq konkýrs bastaldy.