Eldegi Aqsoran ken ornynda volfram óndirý 2028 jylǵa josparlanǵan
ASTANA. KAZINFORM — Soltústik Qazaqstan jáne Aqmola oblystarynyń aýmaǵynda ornalasqan Aqsoran ken ornynda volfram óndirýdi 2028 jyly bastaý josparlanyp otyr. Bul týraly taý-ken jumystary josparyna engiziletin túzetýlerdiń yqtımal áserleri týraly esepte aıtylǵan.
Qujatqa sáıkes, bekitilgen qorlar negizinde kenishti paıdalaný merzimi 16 jyl. Onyń ishinde kásiporyn 13 jyl boıy jylyna 1 mln tonna ken óndirý jobalyq qýatymen jumys isteıdi. Ken ornyn ıgerýge bólingen jer qoınaýy ýchaskesiniń jalpy aýdany 4,499 sharshy shaqyrym.
— Kenishtiń jalpy óndiristik qýaty jylyna 1 mln tonna bolyp belgilengen, keıin óndiris kólemi birtindep tómendeıdi. Jobalaý kezinde qabyldanǵan qorlar negizinde kenishtiń paıdalaný merzimi 16 jyl. Onyń ishinde belgilengen qýatpen (jylyna 1 mln tonna) ken óndirý jumystary bastalǵan kúnnen bastap 13 jyl jumys isteıdi, — delingen qujatta.
Aıta keteıik ken óndirýdi 2028 jyly bastaý kózdelgen. Al osy ýaqytqa deıin óndiriletin kendi óńdeıtin baıytý fabrıkasyn salý josparlanǵan. Oǵan qosa bir jyl boıy taý-ken kúrdeli jumystary men taý-ken daıyndyq jumysy júrgiziledi. Ken óndirý bastalǵannan keıin bul jumys ken ornyn paıdalanýmen qatar jalǵasady.
— Jer asty tásilimen jumys júrgizilgen kezde arshý jumystary taý-ken kúrdeli jumystary jáne taý-ken daıyndyq jumystary bolyp bólinedi. Aqsoran ken ornynda ken óndirý bastalǵanǵa deıin taý ken kúrdeli jumystary men taý-ken daıyndyq jumystary bir jyl boıy, ıaǵnı 2027 jyly júrgiziledi. Keıin bul jumystar ken óndirýmen qatar jalǵasady. Taý-ken daıyndyq jumystary ken denesin ashyp, ken shyǵarýdy qamtıdy. Ken óndirý 2028 jyldan bastalady, — dep kórsetilgen esepte.
Qujatqa sáıkes, ken ornyn jer asty tásilimen ıgerý josparlanǵan.
Aıta keteıik, Aqsoran ken orny Soltústik Qazaqstan oblysynyń Aıyrtaý aýdany men Aqmola oblysynyń Sandyqtaý aýdany aýmaǵynda ornalasqan. Ol Shantóbe kentinen soltústik-shyǵysqa qaraı shamamen 38 shaqyrym jáne Balkashıno aýylynan soltústik-batysqa qaraı 35 shaqyrym jerde ornalasqan. Ken ornynyń bir bóligi «Kókshetaý» memlekettik ulttyq tabıǵı parkiniń qorǵaý aımaǵyna kiredi.
Eske sala keteıik, 2024 jyly Qazaqstan tarıhynda alǵash ret volfram óńdeıtin zaýyt ashylǵan edi.
