Eldegi 59 temirjol vokzalynyń 54-i jóndeýdi qajet etedi – Kólik mınıstri

ASTANA. KAZINFORM – Kólik mınıstri Marat Qarabaev Úkimet otyrysynda temirjol vokzaldarynyń jaı-kúıine toqtaldy.

«Jolaýshylar tasymalyna toqtalatyn bolsaq, 2024 jyldyń 10 aıynda 17 mln 600 myń jolaýshy tasymaldandy. Bul ótken jyldyń sáıkes kezeńimen salystyrǵanda 6%-ǵa joǵary. Jyl sońyna deıin 21 mln jolaýshy tasymaldaý josparlanyp otyr. Tasymaldaý protsesiniń qolaılylyǵyn qamtamasyz etý úshin temirjol vokzaldaryn modernızatsııalaý qajet», - dedi mınıstr.

Onyń aıtýynsha, qazir tek Qyzylorda, Shymkent, Pavlodar jáne Túrkistan qalalarynyń vokzaldary ǵana tolyq kúrdeli jóndeýden ótken.

«59 negizgi temirjol vokzalynyń 54-i (jergilikti ákimdikter balansynda – 4, QTJ balansynda – 50) jóndeýdi talap etedi. Qazirgi ýaqytta tek Qyzylorda, Shymkent, Pavlodar jáne Túrkistan qalalarynyń vokzaldary tolyq kúrdeli jóndeýden ótti. Qalǵan vokzaldardy jóndeý boıynsha qajetti tehnıkalyq qujattar ázirlenýde jáne qarjylandyrý kózderi men mehanızmderi pysyqtalyp jatyr», - dedi Marat Qarabaev.