Eldegi 50% jeńildikter: satyp alýshylar neni kóp alyp jatyr

Óńirlerdiń málimetinshe, maýsymdyq kıim men aıaqkıim, azyq-túlik, turmystyq hımııa, balalarǵa arnalǵan taýarlar jáne turmystyq tehnıka joǵary suranysqa ıe.

Merekelik aktsııalarǵa barlyǵy 649 saýda nysany qosyldy. Onyń 232-si Republic Day, al 417-si Bereke Fest aktsııasyna qatysýda. Jeńildik mólsheri saýda nysany men taýar sanatyna baılanysty. Jekelegen dúkenderde jeńildikter 50%-ǵa deıin jetedi.

Maýsymdyq kıim men aıaqkıim suranysqa ıe

Óńirlerdiń málimetinshe, aktsııalar kezinde satyp alýshylar kúzgi-qysqy kıimderge erekshe qyzyǵýshylyq tanytýda. Suranysqa ıe taýarlar qatarynda maýsymaralyq kúrteler, paltolar, djınsy shalbarlar, jempirler, sporttyq kostıýmder men aıaqkıimder bar.

Máselen, Almatyda maýsymaralyq kúrteler 39 990 teńgeniń ornyna 25 990 teńgege, djınsy shalbarlar 19 990 teńgeniń ornyna 13 990 teńgege, al balalarǵa arnalǵan sporttyq kostıýmder 24 990 teńgeniń ornyna 13 740 teńgege usynylyp jatyr.

Astanada balalar kúrtelerine 40%, parfıýmerııaǵa 40%, al aıaqkıimniń jekelegen úlgilerine 50%-ǵa deıin jeńildik qarastyrylǵan.

Qostanaı oblysynda balalar kúrteleri men kombınezondarynyń keıbir úlgilerine, sondaı-aq parfıýmerııaǵa 50%-ǵa deıin jeńildik jasalǵan. Atyraý oblysyndaǵy saýda ortalyqtary kıim, aıaqkıim jáne aksessýarlarǵa 10%-dan 50%-ǵa deıin jeńildikter usynyp otyr.

Shymkent qalasyndaǵy saýda nysandarynyń málimetinshe, ótken aımen salystyrǵanda kıim satylymy 18%-ǵa, aıaqkıim 16%-ǵa, al aksessýarlar 15%-ǵa artqan.

Azyq-túlik pen kúndelikti tutynatyn taýarlar

Bereke Fest aktsııasy aıasynda satyp alýshylar azyq-túlik pen turmystyq taýarlardy belsendi túrde satyp alyp jatyr. Óńirlerdiń málimetinshe, azyq-túlik ónimderiniń ishinde kúnbaǵys maıy, un, qant, jarma, sút ónimderi men jumyrtqaǵa suranys joǵary.

Ulytaý oblysyndaǵy sýpermarketteriniń málimetinshe aktsııa kezinde satylym kólemi 20%-ǵa artqan.

Almaty oblysynda Magnum, Small jáne Toimart saýda jelilerinde sút ónimderine, makaronǵa, kúnbaǵys maıyna, kondıterlik ónimderge jáne basqa da taýarlarǵa jeńildikter qarastyrylǵan. Óńir usynǵan málimetke sáıkes, aktsııaǵa qatysýshy saýda nysandarynyń ortasha taýar aınalymy 20–25%-ǵa ósken.

Pavlodar oblysynda suranysqa ıe azyq-túlik taýarlarynyń qatarynda kúnbaǵys maıy, qant, un, jumyrtqa, kúrish jáne qaraqumyq jarmasy atalǵan. Azyq-túlik taýarlaryna jeńildikter 50%-ǵa deıin jetedi.

Turmystyq taýarlar men balalarǵa arnalǵan ónimderge suranys

Azyq-túlikpen qatar satyp alýshylar turmystyq hımııa, jeke gıgıena quraldary men balalarǵa arnalǵan taýarlardy da satyp alyp jatyr.

Astanada kir jýǵysh untaqtardyń jekelegen túrlerine 45%-ǵa deıin, kir jýýǵa arnalǵan gelderge 32%-ǵa deıin, al ydys jýǵysh quraldarǵa 30%-ǵa deıin jeńildik usynylǵan.

Shymkenttegi saýda nysandarynyń málimetinshe, ótken aımen salystyrǵanda jórgekterdiń satylymy 25%-ǵa, balalar taǵamy 30%-ǵa, suıyq sabyn 15%-ǵa 10%-ǵa artqan.

Qaraǵandy oblysynda da jekelegen turmystyq taýarlardyń satylymy ósken. Atap aıtqanda, kir jýýǵa arnalǵan gelderdiń satylymy 20%-ǵa, suıyq sabyn 18%-ǵa ulǵaıǵan.

Sonymen qatar Republic Day aktsııasy aıasynda satyp alýshylar turmystyq tehnıkaǵa, elektronıkaǵa jáne úıge qajetti taýarlarǵa qyzyǵýshylyq tanytýda. Almaty oblysyndaǵy saýda nysandarynda turmystyq tehnıkanyń jekelegen túrlerine 30%-ǵa deıin jeńildikter qarastyrylǵan.

Merekelik aktsııalar qashanǵa deıin jalǵasady

Republic Day aktsııasy saýda-oıyn-saýyq ortalyqtaryn, saýda ortalyqtary men saýda úılerin qamtysa, Bereke Fest aktsııasy saýda jelilerinde ótedi. Merekelik aktsııalarǵa qazaqstandyq marketpleıster de qosylyp, satyp alýshylarǵa taýarlardyń túrli sanattary boıynsha jeńildikter men arnaıy usynystar ázirledi.

Qazaqstan Respýblıkasy Saýda jáne ıntegratsııa mınıstrligi jergilikti atqarýshy organdarmen birlesip, respýblıkalyq aktsııalardy uıymdastyrý boıynsha úılestirý jumystaryn júrgizip jatyr.

Merekelik usynystar 27 qazandy qosa alǵanǵa deıin júrgiziledi. Jeńildikterdiń naqty mólsheri men taýarlar tizimin aktsııaǵa qatysýshy saýda nysandary belgileıdi.

Buǵan deıin Respýblıka kúni qarsańynda 50%-ǵa deıin jeńildikti marketpleıster de usynatynyn jazǵanbyz.