Eldegi 28 myń ǵalymnyń jartysyna jýyǵy jastar - Aqylbek Kúrishbaev
ALMATY. KAZINFORM – Almatyda myńdaǵan jas ǵalymdardyń basyn qosqan III Halyqaralyq jas ǵalymdar kongresi ótip jatyr.
Prezıdent janyndaǵy QR Ulttyq ǵylym akademııasynda uıymdastyrylǵan kongreske 35-ǵa jýyq elden 1 myńnan astam jas ǵalym qatysty. Ǵylymı áleýetti nyǵaıtýǵa jáne halyqaralyq zertteý yntymaqtastyǵyn damytýǵa baǵyttalǵan is-shara Qazaqstan Respýblıkasy Táýelsizdiginiń 35 jyldyǵyna jáne Ulttyq ǵylym akademııasynyń 80 jyldyq mereıtoıyna arnaldy.
Kongress ashylýynda Prezıdent janyndaǵy QR Ulttyq ǵylym akademııasynyń prezıdenti Aqylbek Kúrishbaev is-sharanyń maqsaty - jas ǵalymdarǵa ortaq alań qalyptastyrý, tájirıbeli ǵalymdar men jas zertteýshiler arasyndaǵy baılanysty nyǵaıtý, ulttyq ǵylymı mektepterdi damytý jáne sheteldik jetekshi ǵalymdar men otandyq jas ǵalymdardyń ıntegratsııasyn arttyrý ekenin atap ótti.
- Bıylǵy kongress jumysyna 1 myńnan asa jas ǵalym, sonyń ishinde álemniń 35 elinen zertteýshiler qatysyp jatyr. Memleket basshysy Qasym-Jomart Toqaev Qazaqstannyń bolashaǵynda jas zertteýshilerdiń orny erekshe ekenin únemi atap keledi. 2025 jylǵy málimet boıynsha elimizde ǵalymdar sany 28 myńnan astam adamdy qurasa, onyń jartysyna jýyǵy ıaǵnı 48%-y jas ǵalymdar. Bul jas ǵalymdardy qoldaý saıasatynyń nátıjesi dep aıtýǵa bolady, - dedi UǴA prezıdenti.
Onyń aıtýynsha, akademııa eldegi ǵylymı basymdyqtardy aıqyndaýdyń 4 deńgeıli modelin ázirlegen. Oǵan qazirgi ekonomıkalyq suranysqa saı tehnologııalyq mindetter, bolashaǵy zor zertteý baǵyttary jáne jańa quzyretterdi damytý jatady. Oǵan qosa, zertteýdi naqty nátıjege jetkizý úshin qoldanbaly ǵylym tujyrymdamasy ázirlengen.
- Ol jaqynda qabyldanǵan Qazaqstan Respýblıkasynyń 2026–2030 jyldarǵa arnalǵan ınnovatsııalardy damytý tujyrymdamasyna engizildi. 2027 jyldan bastap sý resýrstary, seısmıkalyq qaýipsizdik, strategııalyq mıneraldar, energetıkalyq materıaldar, jáne avtomobıl joldary tehnologııalary boıynsha baǵdarlamalardy iske qosý josparlanǵan, - dedi Aqylbek Kúrishbaev.
Sondaı-aq ol óńirlik ǵylymdy damytýǵa basymdyq beriletinin atap ótti. Aıtýynsha, ǵylymǵa bólinetin qarjynyń 70%-y, ǵylymı qyzmetkerlerdiń 60%-y Almaty men Astanada shoǵyrlanǵan.
- Bulaı ǵylymdy damytý múmkin emes. Osy oraıda, «Qýatty óńirlik ǵylym – qýatty óńir» bastamasy aıasynda aımaqtarda akademııa Prezıdıýmynyń kóshpeli otyrystary ótip, onda ákimdiktermen jáne bıznes ókilderimen birlesip, óńirlerdiń basym mindetteri aıqyndaldy, - dedi UǴA prezıdenti.
Erteń kongress jumysy Almaty qalasyndaǵy alty joǵary oqý ornynyń bazasynda uıymdastyrylatyn taqyryptyq ǵylymı konferentsııalarmen jalǵasady.
Eske salaıyq, buǵan deıin Qazaqstanda Ortalyq Azııa ǵalymdaryna arnalǵan tsıfrlyq platforma ázirlendi.
