Eldegi 2,6 mln kóliktiń «jasy» 20 jyldan asyp ketken
ASTANA. KAZINFORM — Ákimshilik polıtsııa komıtetiniń tóraǵasy Qaısar Sultanbaevtyń aıtýynsha, jyl basynan beri el aýmaǵyna 108 myń jańa kólik kirgen.
«Ótken jyldyń ózinde kólik sany 500 myńǵa artyp, qazir olardyń sany 5 mln 350 myńnan asty. Bıyl 108 myń avtokólik tirkelgen. Bul jol jelisine túsetin júktemeniń artýyna ákeledi. Biraq elimiz áli de kóliktiń sany boıynsha sharyqtaý shegine jetken joq», — dedi ol ortalyq kommýnıkatsııalar qyzmetinde ótken baspasóz máslıhatynda.
Sondaı-aq, ol eski kólikterden keletin qaýip joǵary ekenin eske saldy.
«Avtokólikterdiń jartysynyń paıdalaný merzimi 20 jyldan asyp ketken. Árıne, eski kólikterde belsendi jáne passıvti qaýipsizdiktiń zamanaýı júıeleri joq, sol úshin olar buzylýǵa beıim bolady», — dedi komıtet basshysy.
