Eldegi 22 áýejaı qaı eldiń ınvestorlaryna beriledi – mınıstr jaýaby
ASTANA. KAZINFORM – Kólik mınıstri Marat Qarabaev Úkimet otyrysynan keıin ótken baspasóz máslıhatynda eldegi 22 áýejaı qaı eldiń ınvestorlaryna senimgerlik basqarýǵa beriletinin aıtty.
«Jyl basynda Eýropa-Ortalyq Azııa kólik logıstıkalyq ınvestıtsııa forýmynda Qazaqstan 22 áýejaıdy ınvestorlardyń basqarýyna berýge daıyn ekenin aıtqan edińiz. Tizimniń basynda qaı qalanyń áýejaılary tur jáne qaı eldiń ınvestorlaryna berildi? Reseılik ınvestorlar kelse, áýejaılardyń sanktsııaǵa tap bolmaıtynyna kim kepil bola alady?» - dep surady jýrnalıst.
Kólik mınıstri ázirge reseılik ınvestorlardan usynys túspegenin aıtady.
«Biz siz aıtqan 22 áýejaıdyń barshasyna kezeń-kezeńimen sheteldik ınvestorlardy tartyp otyrmyz. Mysaly, Almatydaǵy áýejaıdy Túrkııa men Frantsııanyń ınvestorlary basqarýǵa aldy. Astana áýejaıyn Birikken Arab Ámirlikteriniń kompanııasy senimgerlik basqarýǵa alǵany ózderińizge málim.
Taraz ben Shymkenttegi eki áýejaı otandyq ınvestor, ıaǵnı, Scat áýe kompanııasy ıesiniń senimgerlik basqarýyna berildi. Aqtaýdaǵy áýejaı túrkııalyq ınvestorǵa berildi. Dál osyndaı ár áýejaı boıynsha túrli ınvestordy tartyp jatyrmyz. Atyraýdaǵy áýejaıǵa qatarlyq úlken áýejaı kirip otyr. Olar 2026 jylǵa deıin múlde jańa aerovokzal salýdy josparlap otyr», - dedi ol.
Vedomstvo basshysy Qazaqstannyń áýejaı naryǵyna keletin sheteldik kompanııalardyń sanktsııaǵa iligý yqtımaldyǵy mindetti túrde eskeriletinin aıtty.
«Reseı kompanııalarynyń tarapynan qyzyǵýshylyq bolsa, ár kompanııamen jeke-jeke jumys isteımiz. Bul jerde áýejaı strategııalyq nysan bolǵandyqtan senimgerlik basqarýǵa kim alsa da, árqashan memleket baqylaýynda bolady. Senimgerlik basqarýǵa berýden buryn da memleket ár kompanııanyń múmkindigine jeke-jeke taldaý jasaıdy. Sonyń negizinde sońǵy sheshim qabyldaıdy. ıAǵnı, qandaı negizde jáne qandaı kelisimshart boıynsha basqarýǵa beriletini zerdelenedi. Osy ýaqytqa deıin reseılik kompanııalardan naqty usynys túsken joq», - dedi Marat Qarabaev.