Eldegi 196 alpaýyt kásiporynnan 1,4 trln teńge salyq túspeı jatyr — senator
ASTANA. KAZINFORM — Parlament Senaty Qarjy jáne bıýdjet komıtetiniń tóraǵasy Sultanbek Mákejanov Jibek Joly telearnasyna bergen suhbatynda eldegi iri kásiporyndardyń tóleıtin salyǵy azaıyp bara jatqanyna alańdaıtynyn aıtty.
— Ótip ketken jyldyń bıýdjet nátıjesin qaramaı, ol jerdegi kemshilikterdi eskermeı keler jyldyń bıýdjetin qaraı salý durys emes. 2024-2026 jyldardyń bıýdjetin naqtylaǵan kezde kóńil tolmaıtyn bir másele boldy. Kirister men shyǵystardy bekitken kezde 3,1 trln teńge salyq azaıyp, saldarynan salyq túsimi 12,7 trln teńge bolyp qaldy. Endi sol 3,1 trln teńgeniń ornyn jabý úshin Ulttyq qordan, basqa da kózderden qarjy aldyq. Ulttyq qordan alǵan jalpy qarajattyń kólemi 6,1 trln teńge boldy, — dep eske aldy depýtat.
Senator bıýdjet tapshylyǵyna eldegi alpaýyt kásiporyndardyń da qatysy bar ekenin aıtady.
— Munaı óndirý kóleminiń azaıýy saldarynan 200 mlrd teńge salyq túspeı qaldy. Syrtqy saýdanyń azaıýynan 300 mlrd teńge salyq túspeı qaldy. 2023 jyldyń qorytyndysy boıynsha qosylǵan qun salyǵynyń qaryzy 595 mlrd teńge bolǵan. Osylaısha 1 trln teńge myna jaqtan (Ulttyq qordan-red) shyǵyp jatyr. Elde 196 iri kásiporyn bar. Solarda 1,4 trln salyq taǵy túspeı qaldy. Onyń sebebin suradyq. Negizgi sebebin ótkizetin túrli-tústi metaldyń quny túsip ketkenimen baılanystyrdy. Qazir osy máseleniń kelesi jylda qaıtalanbaýy úshin ne isteý kerektigin qarap jatyrmyz, — dedi Sultanbek Mákejanov.
Eske salaıyq, 2025 jyly eldegi bıýdjet tapshylyǵy 4,1 trln teńge dep aıqyndalǵan bolatyn.