Elde júzim qansha turady
ASTANA. KAZINFORM – Bıyl kúzde Qazaqstanda júzim baǵasynda surpyna qaraı óńirde ártúrli baǵada satylyp jatyr. Eń iri qalalar boıynsha derekterge sáıkes, tanymal jemistiń kelisi 500 teńgeden 2800 teńgege deıin ózgeredi, dep habarlaıdy Kazinform tilshisi.
Júzimniń quny boıynsha óńirlerde bes esege deıin aıyrmashylyq bar. Eń arzan baǵa dástúrli túrde jetkizýshilerge jaqyn ornalasqan ońtústik aımaqtarda. Munda jemis tezirek sórelerge túsip, tutynýshy úshin arzanyraq bolady.
Al soltústik pen batys óńirlerde eń qymbat baǵa tirkelip otyr. Munda logıstıka, negizgi jetkizýshilerden qashyqtyq qana emes, sonymen qatar suranys ta áser etedi: óz baqshasy az óńirlerde júzim kóbine premıým ónim retinde qabyldanady.
«Damskıı palchık»
Júzimniń bul túri árqashan eń suranysqa ıe. Alaıda onyń qoljetimdiligi aımaqqa baılanysty qatty ózgeredi.
Eń tómengi baǵa – Qyzylordada, munda kelisi nebári 800 teńge.
Eń joǵarǵysy – birden eki qalada: Shymkent pen Aqtaýda kelisi 2500 teńge.
El boıynsha ortasha baǵa – 1415 teńge/kg.
Ońtústik jáne ortalyq aımaqtarda: Almaty, Qaraǵandy, Jezqazǵan, Taraz qalalarynda baǵa 1000–1300 teńge aralyǵynda. Batysta – Atyraý, Aqtaýda júzim áldeqaıda qymbat, al soltústikte – Petropavl men Kókshetaýda eń joǵary kórsetkish tirkelgen.
«Kıshmısh»
Taǵy bir tanymal sort – kıshmısh. Onyń baǵasy odan da qubylyp tur.
Eń arzan baǵa – Qyzylordada, munda kelisi 500 teńge.
Eń qymbaty – Kókshetaýda, munda kılogramy 2800 teńgege deıin jetedi.
El boıynsha ortasha baǵa – 1267 teńge/kg.
Ońtústikte: Almaty, Túrkistan, Taraz qalalarynda baǵa 800–1000 teńge shamasynda bolyp, kópshilik úshin qoljetimdi. Al soltústik pen batysta quny eki-úsh esege qymbat.
Eki sorttyń ortasha qunyn eseptegende jaǵdaı mynadaı:
Eń arzan baǵa – Qyzylordada (650 tg/kg).
Eń qymbat baǵa – Kókshetaýda (2400 tg/kg).
Ońtústik jáne ortalyqta – Almaty, Qaraǵandy, Jezqazǵan, Taraz, Túrkistanda júzimniń baǵasy 900–1200 teńge aralyǵynda.
Batysta – Atyraý, Aqtaýda, al soltústikte – Kókshetaý, Petropavl, Óskemen, Semeıde baǵa 1450–2400 teńge deńgeıinde.
Eske salsaq Qazaqstanda kádi men baıaldy qansha turatyny týraly jazǵan edik.