Elde jumyspen qamtylǵan halyqtyń sany qansha
ASTANA. KAZINFORM — Belsendi jumys istep turǵan zańdy tulǵalardyń sany 174 myńdy qurady. Bul týraly Úkimet otyrysynda Eńbek jáne halyqty áleýmettik qorǵaý mınıstri Asqarbek Ertaev málim etti.
- Eńbek mınıstrligi jumyskerlerdiń eńbek quqyqtaryn qorǵaý boıynsha belsendi jumys júrgizip jatyr. Jumyskerdiń eńbek qyzmetin zańdastyrý jáne saqtandyrý júıesimen qamtý máselelerin de qolǵa alǵan. Statıstıka derekteri boıynsha qazirgi kezeńde jumyspen qamtylǵan halyq sany 9,4 mln adamdy qurady. Sonyń ishinde 7,3 mln-y – jaldamaly jumyskerler, - dedi A. Ertaev.
Onyń aıtýynsha, «HR Enbek» júıesinde 6,7 mln eńbek sharty tirkelgen.
Bul jaldamaly jumyskerlerdiń 92 paıyzyn qamtıdy. Azamattyq-quqyqtyq sıpattaǵy sharttar negizinde shamamen 575 myń adam óz qyzmetin júzege asyrady.
- Belsendi jumys istep turǵan zańdy tulǵalardyń sany 174 myńdy qurady, onyń ishinde 1200-i iri, 2900-y orta jáne 169 myńy shaǵyn kásiporyn. Jumyskerlerdi jazataıym oqıǵalardan mindetti saqtandyrý arqyly áleýmettik qorǵaý jónindegi jumys aıasynda 118 myń kásiporyn qamtyldy nemese jumys istep turǵan zańdy tulǵalardyń 68 paıyzyn qurady. Búginde 19 myń ujymdyq shart tsıfrlandyryldy. Bul ótken jylmen salystyrǵanda eki ese kóp, - dedi mınıstr.
Buǵan deıin habarlanǵandaı, Asqarbek Ertaev 480 myńǵa jýyq adam eńbek jaǵdaılary zııandy jáne qaýipti jumystarda isteıtinin aıtty.
