Elde júk jáne jolaýshylar tasymalynyń kólemi artty
ASTANA. KAZINFORM – 2026 jyldyń birinshi jartyjyldyǵynda Qazaqstanda barlyq kólik túrimen 979,4 mln jolaýshy tasymaldandy, bul ótken jyldyń sáıkes kezeńimen salystyrǵanda 5,5% artyq. Osy kezeńde jolaýshylar aınalymy 5,1% ósti.
Jolaýshylar tasymalynyń negizgi úlesi dástúrli túrde avtomobıl kóligine tıesili boldy. Avtomobıl kóligimen 962,7 mln jolaýshy tasymaldandy. Alty aı ishinde temirjol kóliginiń qyzmetin — 9,2 mln, áýe kóligin — 7,4 mln, teńiz kóligin — 14 myń jolaýshy paıdalanǵan. Jolaýshylar tasymalynan túsken kásiporyndardyń kirisi 0,8 mlrd teńge.
— Jolaýshylar aınalymynyń eń joǵary ósimi Qostanaı oblysynda tirkeldi — 62,7%. Sondaı-aq aıtarlyqtaı ósim Almaty qalasynda — 22,3%, Aqmola oblysynda — 20,6% jáne Shymkent qalasynda — 19,2% baıqaldy. Almaty oblysynda jolaýshylar aınalymy 15,8%, Qaraǵandy oblysynda — 14,2%, Jetisý oblysynda — 13,6%, Batys Qazaqstan oblysynda — 10% ósti. Jambyl jáne Soltústik Qazaqstan oblystarynda ósim 8,9%, Aqtóbe oblysynda — 4,6%, Abaı oblysynda — 2,3% boldy, — delingen habarlamada.
Júk tasymalynda da oń úrdis saqtaldy. Qańtar-maýsym aılarynyń qorytyndysy boıynsha júk aınalymy ótken jyldyń birinshi jartyjyldyǵymen salystyrǵanda 2% artyp, 255,8 mlrd tonna-kılometr.
— Júk aınalymynyń eń joǵary ósimi Jetisý oblysynda — 16,3% jáne Abaı oblysynda — 12,2% tirkeldi. Qyzylorda oblysynda kórsetkish 8,7%, Astana qalasynda — 8,5%, Aqtóbe oblysynda — 6,9%, Túrkistan oblysynda — 5,8%, Aqmola oblysynda — 4,9%, Ulytaý oblysynda — 4,6%, Shyǵys Qazaqstan oblysynda — 2,5% ósti. Sondaı-aq Batys Qazaqstan, Jambyl jáne Mańǵystaý oblystarynda ósim 1,9%-dan, Almaty qalasynda — 0,4%, Qostanaı oblysynda — 0,2% boldy, — delingen Ulttyq statıstıka bıýrosy taratqan habarlamada.
Aıta ketelik QazAvtoJol aýyr júk kóligi júrgizýshilerine mańyzdy eskertý jasaǵan edi.
