Elde jol sapasyna qoıylatyn talaptar ózgeredi
ASTANA. KAZINFORM — Qazaqstanda jol sapasyn baǵalaýǵa qoıylatyn normatıvtik talaptardy qaıta qaraý boıynsha jumys júrgizilip jatyr. Buǵan jergilikti joldarda júrgizilgen zerthanalyq synaqtardyń nátıjeleri de negiz bolyp otyr. Bul týraly Jol aktıvteri sapasynyń ulttyq ortalyǵy habarlady.
Prezıdent Qasym-Jomart Toqaev jol qurylysynyń sapasyn baǵalaý júıesin qaıta qaraý jáne qurylys jumystarynyń barlyq kezeńinde baqylaýdy kúsheıtý qajettigin atap ótti.
Memleket basshysy Ulttyq jol aktıvteri sapasynyń ortalyǵynyń jumysyn da kúsheıtýdi tapsyrdy.
— Jol ınfraqurylymynyń sapasy jekelegen nysandardy tekserýmen ǵana shektelmeıdi. Joldy jobalaý, salý, jóndeý jáne paıdalaný kezeńderiniń barlyǵynda sapany baǵalaýdyń naqty ári birizdi tásilderi qajet, — deıdi Jol aktıvteri sapasynyń ulttyq ortalyǵy.
Ortalyq mamandary jol-qurylys materıaldarynyń sapasyn zerthanalyq synaqtar arqyly baǵalaıdy, oryndalǵan jumystardyń belgilengen talaptarǵa sáıkestigin tekseredi, tehnologııalyq buzýshylyqtar men aqaýlardy anyqtaıdy.
2026 jyldyń basynan beri jergilikti joldarda 15 myńnan astam jol-qurylys materıalynyń synamasy zertteldi. Zerthanalyq zertteýler nátıjesinde olardyń 32%-y belgilengen talaptarǵa sáıkes kelmegen. Sonymen qatar jyl basynan beri jergilikti joldarda 1 997 tehnologııalyq buzýshylyq pen aqaý anyqtalǵan: onyń 214-i joıylyp, 1 783-i áli joıylǵan joq.
Bul kórsetkishter jol sapasyn baqylaýdyń mańyzyn ǵana emes, anyqtalǵan sáıkessizdikterdi ýaqtyly joıýdyń jáne sapany baǵalaýda naqty ári birizdi talaptardyń bolýynyń qajettigin kórsetedi.
— Osy turǵydan alǵanda, normatıvtik bazany jetildirý jol salasyndaǵy júıeli ózgeristerdiń mańyzdy bóligi sanalady. JOLSAPA óz kezeginde normatıvtik talaptardy ázirleýshi organ retinde emes, jol sapasyn baqylaý barysynda naqty tájirıbede kezdesetin máselelerdi anyqtap, saladaǵy talaptar men sapany baǵalaý tásilderin jetildirý qajettigin kórsetetin kásibı býyn retinde jumys isteıdi, — delingen resmı habarlamada.
Osy másele jaqynda ótken «Sapaly joldar: josparlaýdan paıdalanýǵa deıin» semınar-keńesinde de talqylandy. Úsh kúndik is-shara barysynda joldardy josparlaý, dıagnostıkalaý, jóndeý jáne jobalaý máselelerimen qatar, jol salasynda qoldanylatyn normatıvtik talaptarǵa da erekshe nazar aýdaryldy.
Talqylaý kezinde qoldanystaǵy normatıvtik qujattardaǵy talaptardyń ózara alshaqtyǵy kóterilip, olardy keshendi túrde qaıta qaraý qajettigi aıtyldy. Mundaı jumys jol jumystaryn jáne qoldanylatyn materıaldardyń sapasyn baǵalaýda biryńǵaı tásil qalyptastyrýǵa múmkindik beredi.
Eske sala ketsek, Astana–Temirtaý jolynyń 16 shaqyrymy jańartyldy: 9 kirme jol jasaldy.
Rahman qaınaryna aparatyn jol eki saǵatqa qysqardy.
