Elde jyl basynan beri adam saýdasyna qatysty 85 derek anyqtaldy
ASTANA. KAZINFORM — Qazaqstan jyl basynan beri adam saýdasyna qatysty 85 qylmystyń jolyn kesip, zańsyz kóshi-qonnyń toǵyz arnasyn joıdy. Bul týraly Astanada ótken Túrki memleketteri uıymyna (TMU) múshe elderdiń ishki ister mınıstrleriniń kezdesýinde aıtyldy.
Kezdesýde adam saýdasy men zańsyz kóshi-qonǵa qarsy kúresti kúsheıtý máselesi talqylandy. QR Іshki ister mınıstri Erjan Sádenov mundaı qylmystardy anyqtaýmen qatar, olardyń aldyn alý jáne zardap shekkenderdi qorǵaý jumystary júrgizilip jatqanyn aıtty.
Qazaqstan BUU-nyń Halyqaralyq kóshi-qon uıymymen birlesip, adam saýdasynyń qurbandaryn anyqtaý jónindegi is-qımyl algorıtmin ázirlep, bekitken.
Kezdesýde zańsyz kóshi-qondy uıymdastyrýda qoldanylatyn jańa tásilderge de nazar aýdaryldy. Qylmystyq toptar mıgranttardy zańdastyrý úshin jalǵan jumysqa ornalastyrý, turǵylyqty jeri boıynsha tirkeý jáne jalǵan shaqyrý jasaý sııaqty shemalardy paıdalanatyny aıtyldy.
— Mundaı shemalar kóbine bir eldiń sheginen shyǵyp ketedi, sondyqtan olarǵa qarsy birlesip is-qımyl jasaý qajet, — dedi Erjan Sádenov.
Osyǵan baılanysty mınıstr TMU elderi arasynda zańsyz kóshi-qon arnalary, olardy uıymdastyrýshylar men tasymaldaýshylar, sondaı-aq adam saýdasynyń qurbandary týraly jedel aqparat almasýdy turaqty jolǵa qoıýdy usyndy.
Sonymen qatar eńbek mıgranttary arasynda qanaý belgilerin anyqtaýǵa baǵyttalǵan birlesken is-sharalar ótkizýdi usyndy.
— Bizdiń ortaq mindetimiz — jekelegen faktilerdiń jolyn kesýmen ǵana shektelmeı, uıymdastyrýshylar men deldaldardan bastap, adamdardy tikeleı qanaýmen aınalysatyndarǵa deıingi búkil tizbekti anyqtaý. Eń bastysy — zardap shekkenderdiń ózderin ýaqtyly anyqtap, qorǵaý, — dedi mınıstr.
Eske salaıyq, bıyl jyl basynan beri Mıanma, Kambodja jáne Laosta quldyqta bolǵan elimizdiń 17 azamaty qaıtarylǵany jóninde jazǵan edik.
