Elde JI negizindegi qyzmetterdiń úlesi 40 paıyzǵa jetkizilmek
ASTANA. KAZINFORM – Tsıfrlyq júıelerdi kóshirý boıynsha bıylǵy jospar 92% oryndaldy. Bul týraly Úkimet otyrysynda QR Premer-mınıstriniń orynbasary – Jasandy ıntellekt jáne tsıfrlyq damý mınıstri Jaslan Mádıev málim etti.
- Qazaqstannyń tsıfrlyq bastamalary AI-ekonomıkanyń álemde qalyptasqan qurylymyna sáıkes keledi. Bes deńgeı boıynsha jobalar iske qosylyp, júzege asyrylyp jatyr. Osylaısha, AI-ekonomıkanyń barlyq quramdas bóligi «Digital Qazaqstan» strategııasynda qamtylǵan. Strategııany iske asyrýǵa toqtalaıyn. 20 negizgi baǵyt aıqyndaldy. Olar azamattardy, bıznesti, memlekettik apparat pen óńirlerdi qamtıdy. Sonymen qatar tsıfrlyq memleket qurýǵa qajetti negizdi qalyptastyrý kózdelgen. Osy baǵyttardy ýaqytyly iske asyrý úshin birinshi basshylardyń derbes jaýapkershiligi belgilengenin atap ótý qajet, - dedi J.Mádıev.
Onyń aıtýynsha, memlekettik qyzmetterdiń tsıfrlyq ekojúıesiniń negizi – QazTech platformasy. Tsıfrlyq júıelerdi kóshirý boıynsha bıylǵy jospar 92%-ǵa oryndaldy. QazTech memlekettik servıster men derekterdi biryńǵaı tsıfrlyq platformada biriktiredi.
- Bul «Ómir joly» qaǵıdatyna kóshýge negiz bolady, ıaǵnı qyzmetter proaktıvti túrde, azamattardyń ómirindegi mańyzdy jaǵdaılarǵa sáıkes kórsetiledi. «Áleýmettik ámııan» proaktıvti áleýmettik qoldaý kórsetýdi qamtamasyz etip, 3 mıllıon paıdalanýshyny qamtıdy. e-Otinish-tegi jasandy ıntellekt kómegimen 3,2 mıllıonnan astam ótinish óńdeldi. eGov GPT arqyly 51 qyzmet qoljetimdi. Jyl sońyna deıin jalpy trafıktiń 80%-yn quraıtyn eń suranysqa ıe 150 qyzmet qamtylady. 2028 jylǵa qaraı jasandy ıntellekt negizindegi qyzmetterdiń úlesin 40%-ǵa jetkizý, al 2029 jylǵa qaraı qyzmet alý ýaqytyn eki ese qysqartý kózdelgen, - dedi mınıstr.
Aıta keteıik, jaqynda QazTech, Ulttyq JI platformasy jáne Digital Qazaqstan týraly jazǵan edik.
