Elde jetim balalarmen jumys isteıtin mamandar qaıta daıarlanady
ASTANA. KAZINFORM – 2026 jylǵy mamyrdan bastap Qazaqstanda ata-anasynyń qamqorlyǵynsyz qalǵan jáne jetim balalarǵa arnalǵan bilim berý uıymdarynyń pedagogterin oqytý bastalady.
Qazaqstandyq mamandar jetim balalarmen jumys isteýdiń jańa tásilderine oqytylady
Oqytýdy Qazaqstan Respýblıkasy Oqý-aǵartý mınıstrligine qarasty «Órken» balalardyń ál-aýqatyn arttyrý ulttyq ǵylymı-praktıkalyq ınstıtýtynyń 47 treneri júrgizedi. Baǵdarlama zamanaýı halyqaralyq tájirıbeler men SOS Qazaqstan balalar aýyldarynyń tájirıbesine negizdelgen.
Bul bastama balalardy qorǵaý júıesin jetildirýge jáne qıyn ómirlik jaǵdaıǵa tap bolǵan, travmalyq tájirıbe alǵan balalarmen jumys isteýdiń jańa tásilderin engizýge baǵyttalǵan. Baǵdarlamaǵa elimizdiń barlyq óńirlerinen jetim balalarǵa arnalǵan bilim berý uıymdarynyń pedagogteri, tárbıeshileri, psıhologteri, áleýmettik pedagogteri, ádiskerleri men basshylary qatysady.
— Búginde elimizdegi jetim balalarǵa arnalǵan bilim berý uıymdarynda 1945 maman jumys isteıdi. Mamyr men jeltoqsan aralyǵynda osy mamandardyń barlyǵyn oqytýmen qamtý josparlanýda. Júrgizilgen saýalnama nátıjesinde respondentterdiń 91%-y oqýdan ótýge daıyn ekenin bildirip, qıyn ómirlik jaǵdaıdaǵy balalarmen jáne otbasylarmen jumys isteýdiń zamanaýı ádisterin meńgerýdiń qajettiligin atap ótken, — delingen habarlamada.
Baǵdarlama balalarmen praktıkalyq jumys daǵdylaryn damytýǵa, jeke tásildi qalyptastyrýǵa jáne qaýipsiz, qoldaýshy orta qurýǵa baǵyttalǵan. Baǵdarlamaǵa zamanaýı halyqaralyq ádistemeler engizilgen: travmaǵa baǵdarlanǵan tásil, keıs-menedjment, otbasyn qoldaýdyń ekojúıelik modeli jáne balanyń kúshti jaqtaryna negizdelgen jumys ádisteri.
Ásirese, zorlyq-zombylyqtyń aldyn alýǵa, balalardyń emotsıonaldyq ál-aýqatyna, senimdi qarym-qatynas ornatýǵa jáne kásibı qabyldaýshy otbasylarmen jumys isteýge daıyndyqqa erekshe kóńil bólinedi.
Uıymdastyrýshylardyń aıtýynsha, jańa tásilderdi engizý formaldy súıemeldeýden ár balanyń qajettiligi men ál-aýqatyna baǵyttalǵan júıege kóshýge múmkindik beredi jáne Qazaqstandaǵy jetim balalardy qoldaý júıesin izgilendirýdiń mańyzdy kezeńi bolmaq.
Aıta ketelik elde 43 myńnan astam kámeletke tolǵan jetim baspana ala almaı otyrǵany týraly jazǵan edik.
