Elde jasandy ıntellektini oqytý jospary qalaı iske asyp jatyr
ASTANA. KAZINFORM — Jasandy ıntellekt jáne tsıfrlyq damý mınıstrligi JI-di oqytý baǵytyna qatysty túsinik berdi.
— Memleket basshysynyń Qazaqstan Respýblıkasynda tsıfrlyq jáne JI-ekonomıkany qalyptastyrý jónindegi tapsyrmalaryn iske asyrý aıasynda 2026 jyly tsıfrlandyrý jáne jasandy ıntellekt salasynda kadrlar daıarlaý boıynsha júıeli jumys jalǵasyp, keńeıtiledi. Mınıstrlik negizgi jasandy ıntellekti jáne tsıfrlyq daǵdylardy damytýǵa baǵyttalǵan bes jyldyq oqytý baǵdarlamasyn júzege asyryp keledi. Baǵdarlama daıyndyqtyń barlyq deńgeılerin qamtıdy — jappaı tsıfrlyq saýattylyqtan bastap arnaıy jáne basqarýshylyq quzyretterge deıin. 2025 jyldyń qorytyndysy boıynsha 900 myńnan astam azamat oqytýdan ótti, bul qoǵam tarapynan joǵary suranysty jáne tájirıbege baǵyttalǵan oqytý formattarynyń ózektiligin kórsetedi, — delingen mınıstrliktiń Kazinform agenttigine bergen jaýabynda.
2026 jyly baǵdarlamalar bilim berý, memlekettik basqarý jáne bızneste JI-di qoldanýǵa basymdyq bere otyryp, sondaı-aq maqsatty aýdıtorııalardy keńeıtý arqyly jalǵasady. Suranysy bar IT-mamandardy daıarlaýǵa baǵyttalǵan, oqý qunyn ishinara nemese tolyq óteýdi qarastyratyn Tech Orda baǵdarlamasyn iske asyrý jalǵasady. Baǵdarlama júzege asyrylǵan kezeń ishinde 9 myńnan astam maman daıarlandy. 2025 jyly joǵary konkýrs tirkelip, onyń nátıjesinde 2,6 myńnan astam qatysýshy oqýǵa kiristi. 2026 jyly baǵdarlama eńbek naryǵynyń qajettilikteri men tehnologııalyq basymdyqtardy eskere otyryp jalǵasady.
— Qazaqstandaǵy alǵashqy jasandy ıntellekt mektebi Tomorrow School peer-to-peer modeline negizdelip damyp keledi. Oqytý dástúrli dáris formattarynsyz, komandalyq jumys, jobalyq qyzmet jáne ózara qoldaý qaǵıdattaryna súıenedi. Baǵdarlamaǵa túrli elderden stýdentter qatysyp jatyr, oqý uzaqtyǵy 18 aıdy quraıdy jáne zamanaýı baǵdarlamalaý tilderin meńgerýmen birge ondaǵan praktıkalyq jobalardy oryndaýdy qamtıdy. Alem.ai halyqaralyq jasandy ıntellekt ortalyǵynda 12–18 jas aralyǵyndaǵy jasóspirimderge arnalǵan TUMO Astana tegin bilim berý baǵdarlamasy iske qosyldy. Baǵdarlama dızaın jáne kreatıvti tehnologııalar, sonyń ishinde generatıvti JI daǵdylaryn damytýǵa baǵyttalǵan. Oqytý 2026 jylǵy sáýirde bastalyp, halyqaralyq bilim berý jelisiniń bir bóligine aınaldy, — dep atalyp ótken vedomstvo aqparatynda.
Joǵary bilim berý júıesinde stýdentter arasynda qoldanbaly AI daǵdylaryn qalyptastyrýǵa jáne kásipkerlik, startaptyq oılaýdy damytýǵa baǵyttalǵan AI Sana baǵdarlamasy jalǵasyp jatyr. Baǵdarlamany iske asyrý qorytyndysy boıynsha 650 myńnan astam bilim alýshy sertıfıkat aldy, bul tsıfrlyq ekonomıka úshin keń kadrlyq rezerv qalyptastyrýǵa múmkindik beredi.
Memlekettik apparattyń tıimdiligin arttyrý maqsatynda memlekettik qyzmetshilerdiń kúndelikti qyzmetine JI engizýge baǵyttalǵan AI Qyzmet baǵdarlamasy júzege asyrylýda. Oqytý aqparatty taldaý, josparlaý, mindetterdi avtomattandyrý, basqarýshylyq sheshimder daıyndaý jáne kópshilik aldynda sóıleý stsenarıılerin qamtıdy. Baǵdarlama boıynsha 50 myńnan astam memlekettik qyzmetshi oqytyldy.
2026 jyly memlekettik sektorda jasandy ıntellektini aýqymdy engizý jáne ınstıtýtsıonaldandyrý úshin basshylardy daıarlaýǵa baǵyttalǵan AI Governance 500 strategııalyq baǵdarlamasy iske qosyldy. Baǵdarlama basqarýshylarǵa arnalǵan jáne AI-strategııa, retteý, etıka jáne JI-di turaqty engizý salasyndaǵy quzyretterdi qalyptastyrady.
Baǵdarlamanyń jeke baǵyty mektep júıesi men pedagogtardy qoldaýǵa arnalǵan. Shamamen 300 myń pedagog bilim berý protsesinde JI quraldaryn qoldaný boıynsha oqytýdan ótti, bul oqytý sapasyn arttyrýǵa jáne bilim berýdi tsıfrlyq ortaǵa beıimdeýge yqpal etedi.
Budan bólek, bBıznesti qoldaý maqsatynda AI Corporate baǵdarlamasy iske asyrylýda. Baǵdarlama JI-di nólden bastap meńgerýge jáne ony bıznes-protsesterge avtomattandyrýǵa, taldaýǵa jáne basqarý tıimdiligin arttyrýǵa, engizýge baǵyttalǵan. Alǵashqy tegin oqý legi 2026 jylǵy aqpanda bastaldy.
Qosymsha retinde, el boıynsha 19 óńirlik IT-hab jumys isteıdi, onda azamattar tsıfrlyq daǵdylardy tegin meńgerip, praktıkalyq daıyndyqtan óte alady. Onlaın oqytý formattary turǵylyqty jerine qaramastan baǵdarlamalarǵa qoljetimdilikti keńeıtýge múmkindik beredi.
— Osy jyldyń sáýir aıynda Stanford University Human-Centered Artificial Intelligence (HAI), ChatGPT jasaýshysynyń bilim berý platformasy — OpenAI Academy jáne Kremnıı alqabyndaǵy halyqaralyq Silkroad Innovation Hub-men seriktestikte «AI Leaders 2026» flagmandyq bilim berý baǵdarlamasy bastaldy. Oqý 8 sáýirde bastalyp, ıntensıvti live-sessııalary formatyndaǵy 30 saǵattan astam oqýdy qamtıdy jáne keń aýdıtorııa úshin ozyq bilimge qoljetimdilikti qamtamasyz ete otyryp, qazaq, ózbek jáne orys tilderindegi aýdarmamen súıemeldenedi, — dep naqtylady mınıstrlik.
Budan buryn habarlanǵandaı, 2035 jylǵa qaraı Qazaqstanda 562 kásip nemese eńbek naryǵynyń 44%-y (shamamen 4 mln adam) jasandy ıntellektiniń yqpalymen ózgerýi múmkin.
