Elde jasandy ıntellekt salasynda 7 ulttyq standart ázirlenedi
ASTANA.KAZINFORM — Qazaqstanda jasandy ıntellekt salasynda jeti ulttyq standart ázirlenip jatyr. Bul týraly Saýda jáne ıntegratsııa mınıstrliginiń Tehnıkalyq retteý jáne metrologııa komıtetiniń tóraǵasy Janna Esenbekova habarlady.
Búgin Astanada «Ortalyq Azııa jáne ISO» aımaqtyq kezdesýi ótti, oǵan ISO (Halyqaralyq standarttaý uıymy) bas hatshysy Serhıo Mýhıka qatysty.
— Bul kezdesý tutas aımaq úshin mańyzdy oqıǵa boldy. ISO bas hatshysynyń qatysýy Ortalyq Azııanyń halyqaralyq standarttaý júıesindegi róli artyp kele jatqanyn kórsetedi. Biz tsıfrlandyrýdyń qarqyndy jaǵdaıynda standarttar qalaı ózgerip, damýy kerek ekenin talqyladyq. Jasandy ıntellekt, blokcheın, zattar ınterneti endi bolashaq emes, biz jumys istep jatqan shyndyqqa aınaldy, — dedi Janna Esenbekova.
Ol Qazaqstannyń tsıfrlyq damýdyń jahandyq kúntártibine belsendi kiriskenin atap ótti.
— Bıyl elimizde jasandy ıntellekt salasynda ISO halyqaralyq qujattaryna negizdelgen jeti ulttyq standart ázirlenip jatyr. Olar termınologııa, syn-qaterdi basqarý jáne JI júıeleriniń arhıtektýrasy máselelerin qamtıdy, — dedi spıker.
Sonymen birge, kezdesýde Qazaqstan ókili resmı túrde Eýropa men Ortalyq Azııadaǵy orys tildi elder úshin ISO aımaqtyq menedjeri bolyp taǵaıyndalǵany jarııalandy.
— Bul bizdiń eldiń halyqaralyq standarttaýdaǵy ornyn nyǵaıtyp, óńirde yntymaqtastyqtyń jańa múmkindikterin ashatyn mańyzdy qadam, — dep atap ótti komıtet tóraǵasy.
Aıta keteıik, Memleket basshysy Qasym-Jomart Toqaev Halyqaralyq standarttaý uıymynyń (ISO) Bas hatshysy Serhıo Mýhıkany qabyldady. Prezıdent Qazaqstannyń ISO-men birge tsıfrlyq transformatsııa, ornyqty damý jáne tsıfrlandyrý sekildi salalarda birlesken jobalardy iske asyrýǵa áleýeti mol ekenin jetkizdi.