Elde jarty jylda 10 tonnaǵa jýyq esirtki tárkilendi
ASTANA. KAZINFORM — Astanada hımııalyq zattar men esirtki quraldarynyń monıtorıngi máselelerine arnalǵan ekijaqty sarapshylyq keńes ótti.
Dıalog alańy Qazaqstan Respýblıkasy Bas prokýratýrasynyń, Ulttyq qaýipsizdik komıtetiniń, Іshki ister, Densaýlyq saqtaý, Ádilet, Qarjy mınıstrlikteriniń, Qarjy monıtorıngi agenttiginiń, Ulttyq bankiniń, «Tsıfrlyq ekonomıkany damytý ortalyǵy» JShS-niń, sondaı-aq halyqaralyq seriktester — AQSh-tyń Astanadaǵy elshiliginiń Esirtkimen halyqaralyq kúres jáne zań ústemdigin qamtamasyz etý jónindegi bóliminiń, AQSh-tyń Esirtkige qarsy kúres basqarmasynyń Stanbuldaǵy keńsesiniń jáne AQSh Keden jáne shekara qyzmetiniń Ulttyq targetıng ortalyǵynyń jedel qyzmeti ókilderin biriktirdi.
Konsýltatsııalar barysynda qatysýshylar esirtki men prekýrsorlardyń zańsyz aınalymyn anyqtaý jáne jolyn kesýdiń zamanaýı tásilderin, vedomstvoaralyq ózara is-qımyldy jetildirý, taldaý quraldaryn qoldaný jáne jedel aqparat almasý máselelerin talqylady.
Transulttyq esirtki qylmysyna qarsy tıimdi kúrestegi negizgi faktorlardyń biri retinde halyqaralyq yntymaqtastyqty damytýǵa erekshe nazar aýdaryldy.
Baǵdarlamanyń negizgi bóliginde Qazaqstannyń Ulttyq vedomstvoaralyq targetıng ortalyǵy tanystyrylyp, AQSh Ulttyq targetıng ortalyǵynyń tájirıbesi zerdelendi. Amerıkalyq sarapshylar vedomstvoaralyq ózara is-qımyldyń qoldanystaǵy modelin, taldamalyq jumys úderisterin, úlken derekterdi paıdalaný tájirıbesin, Chemex júıesi arqyly prekýrsorlardy monıtorıngteýdiń zamanaýı ádisterin, sondaı-aq hımııalyq zattardyń zańsyz halyqaralyq saýda jelilerin anyqtaý jáne joıý tásilderin tanystyrdy.
Sonymen qatar taraptar birlesken standartty operatsııalyq rásimderdi ázirleý jáne jedel aqparat almasý tetikterin jetildirý máselelerin qarastyrdy. QR ІІM esirtki qylmysyna qarsy is-qımyl komıteti tóraǵasynyń mindetin atqarýshy Eldar Ábdikenov esirtki qylmysynyń qarqyndy ózgerýi memlekettik organdar men halyqaralyq uıymdardyń kúsh-jigerin biriktirýdi talap etetinin atap ótti.
— Búginde qylmystyq toptar tsıfrlyq tehnologııalardy, krıptovalıýtalardy, ınternet-platformalardy, halyqaralyq logıstıkalyq baǵyttardy jáne hımııalyq zattardy jetkizýdiń zańdy arnalarynyń múmkindikterin belsendi paıdalanýda. Mundaı jaǵdaıda taldaý, táýekelderdi anyqtaý, vedomstvoaralyq ózara is-qımyl jáne halyqaralyq aqparat almasý mańyzǵa ıe. Jalpy qabyldanyp jatqan sharalar naqty nátıjeler berýde. Bıylǵy jyldyń birinshi jartyjyldyǵynyń qorytyndysy boıynsha QR ІІM shamamen tórt myń esirtki quqyq buzýshylyǵyn anyqtady. Alty uıymdasqan qylmystyq toptyń qyzmeti toqtatyldy, onyń biri transulttyq sıpatta bolǵan. Sıntetıkalyq esirtki óndiretin 15 jasyryn zerthana joıyldy. Zańsyz aınalymnan shamamen 10 tonna esirtki tárkilendi, onyń ishinde 578 kılogramnan astamy sıntetıkalyq esirtki. Sonymen qatar jetkizý arnalarynyń ýaqytyly anyqtalýynyń arqasynda zańsyz aınalymǵa 12 tonnadan astam prekýrsordyń túsýine jol berilmedi. Degenmen qylmystyq jeliler barǵan saıyn tehnologııalyq ári transulttyq sıpat alyp keledi. Sondyqtan halyqaralyq yntymaqtastyqty odan ári nyǵaıtý jáne zamanaýı taldamalyq sheshimderdi engizý bizdiń negizgi basymdyqtarymyzdyń biri bolyp qala beredi, — dedi Eldar Ábdikenov.
Іs-shara qorytyndysy boıynsha qatysýshylar seriktestikti odan ári keńeıtýdiń mańyzdylyǵyn atap ótip, esirtki men prekýrsorlardyń zańsyz aınalymyna qarsy is-qımyl salasyndaǵy kásibı tájirıbemen almasty. Ótkizilgen konsýltatsııalar qylmystyq shemalardy anyqtaý tetikterin jetildirýge, quzyretti organdardyń taldamalyq áleýetin damytýǵa jáne óńirlik qaýipsizdikti qamtamasyz etýde halyqaralyq ózara is-qımyldy nyǵaıtýǵa negiz bolady.
Aıta ketelik Taılandtan 8,8 keli esirtki ákelmek bolǵan qazaqstandyq 16 jylǵa sottaldy.
