Elde járdemaqy men tólemder boıynsha qandaı ózgeris boldy
ASTANA. KAZINFORM – Eńbek jáne halyqty áleýmettik qorǵaý mınıstrligi jyl basynan elimizdegi járdemaqy men zeınetaqyǵa qatysty ózgeristerge túsinik berdi.
2026 jylǵy 1 qańtardan bastap memlekettik járdemaqylar mólsheriniń ósýine qatysty birneshe mysal:
* 1, 2, 3 bala týǵanda beriletin járdemaqy 149 416 teńgeden 164 350 teńgege deıin, 4 jáne odan da kóp bala týǵanda – 247 716 teńgeden 272 475 teńgege deıin ulǵaıady;
* mólsheri bala sanyna baılanysty kópbalaly otbasylarǵa beriletin járdemaqy 4 balasy bar otbasylar úshin 63 030 teńgeden 69 330 teńgege deıin, 10 balasy barlarǵa – 157 280 teńgeden 173 000 teńgege deıin artady;
* I toptaǵy múgedektigi bar adamdarǵa arnalǵan járdemaqy 101 702 teńgeden 111 872 teńgege deıin, II toptaǵylarǵa – 81 362 teńgeden 89 498 teńgege deıin, III toptaǵylarǵa – 55 474 teńgeden 61 021 teńgege deıin ulǵaıady.
- Sondaı-aq Memlekettik áleýmettik saqtandyrý qorynan (MÁSQ) tólenetin asyraýshysynan aıyrylý jáne eńbek etý qabiletinen aıyrylý boıynsha tólemder de 10%-ǵa artty. Bul tólemder mindetti áleýmettik saqtandyrý júıesine qatysýshylarǵa bıýdjetten tólenetin memlekettik járdemaqylarǵa qosymsha júzege asyrylady. Tólemderdiń mólsheri jeke esepteledi jáne sońǵy 2 jylda MÁSQ-qa áleýmettik aýdarymdar júrgizilgen ortasha aılyq tabysqa, eńbek etý qabiletinen aıyrylý koeffıtsıentterine, asyraýyndaǵy adamdar sanyna, mindetti áleýmettik saqtandyrý júıesine qatysý ótiline jáne tabysty almastyrýǵa baılanysty bolady, - delingen mınıstrlik aqparatynda.
Zeınetaqy
- 2026 jylǵy 1 qańtardan bastap memlekettik járdemaqylardyń, bazalyq jáne yntymaqty zeınetaqylardyń barlyq túrleriniń mólsheri QR Ulttyq banki aıqyndaıtyn ınflıatsııanyń boljamdy deńgeıine sáıkes 10 paıyzǵa ósti. Budan basqa, Memleket basshysynyń tapsyrmasy boıynsha 2023 jyldan bastap bes jyl ishinde eń tómengi bazalyq zeınetaqyny eń tómengi kúnkóris deńgeıiniń 70%-yna deıin, al eń joǵarǵysyn 120%-ǵa deıin jyl saıyn kezeń-kezeńimen arttyrý júzege asyrylyp keledi. Máselen, 2026 jylǵy 1 qańtardan bastap bazalyq zeınetaqynyń eń tómengi mólsheri 35 596 teńgeni (eń tómengi kúnkóris deńgeıiniń 70%-y), eń joǵary mólsheri eń tómengi kúnkóris deńgeıiniń 110%-ynan 118%-yna deıin artyp, 60 005 teńgeni quraıdy, - dep atalyp ótken vedomstvo málimetinde.
Mysaly, 2019 jyly zeınetkerlik demalysqa shyqqan 70 jastaǵy zeınetkerdiń bıýdjetten tólenetin zeınetaqysynyń mólsheri 2025 jyly 171 588 teńgeni qurady, onyń ishinde bazalyq zeınetaqy tólemi – 50 851 teńge, yntymaqty zeınetaqy – 120 737 teńge. 2026 jylǵy 1 qańtardaǵy ósimdi eskere otyryp, osy zeınetker úshin zeınetaqynyń jalpy somasy 192 816 teńgege deıin ulǵaıady. Onyń ishinde bazalyq zeınetaqy – 60 005 teńgeni, yntymaqty zeınetaqy – 132 811 teńgeni quraıdy. Atalǵan somalarǵa BJZQ tólemderi kirmeıtinin atap ótken jón.
Aıta keteıik, Parlament Májilisi qabyldaǵan qujatqa sáıkes, ákelerdiń bala kútimine baılanysty demalysy zeınetaqy taǵaıyndaý kezinde eńbek ótiline esepteledi.