Elde jańǵyrtýdan keıin 30 temirjol vokzaly ashyldy

Jumys Memleket basshysynyń kólik ınfraqurylymyn damytý jáne jolaýshylar tasymalynyń sapasyn arttyrý jónindegi tapsyrmalaryn iske asyrý aıasynda isteldi.

Jańǵyrtý sońǵy jyldardaǵy temirjol vokzaldaryn jańartýdyń eń iri jobasy boldy. Rekonstrýktsııa nátıjesinde jolaýshylarǵa arnalǵan jaǵdaılar aıtarlyqtaı jaqsardy, qaýipsizdik pen jaılylyq deńgeıi artty, nysandardyń ótkizý qabileti ulǵaıdy, sondaı-aq temirjol salasy qyzmetkerleri úshin zamanaýı eńbek jaǵdaılary jasaldy.

— Jumys barysynda ǵımarattardyń qasbetteri men shatyrlary jańartyldy, energııa únemdeıtin vıtrajdar ornatyldy, jylý júıeleri, sýmen jabdyqtaý, jeldetý, aýany baptaý, órt qaýipsizdigi jáne beınebaqylaý júıeleri jańǵyrtyldy. Qurylys jáne rekonstrýktsııa kezinde negizinen otandyq óndiristiń materıaldary paıdalanyldy.

Erekshe nazar kedergisiz orta qalyptastyrýǵa aýdaryldy. Vokzaldarda pandýstar, lıftiler, beıimdelgen kireberis aımaqtary men sanıtarlyq bólmeler, taktıldi jolaqtar jáne arnaıy kassa aımaqtary jabdyqtaldy. Nysan sanatyna qaraı ana men bala bólmeleri, medıtsınalyq pýnktter, saqtaý kameralary qarastyrylyp, jolaýshylar aǵynyn tıimdi uıymdastyrý úshin úı-jaılar qaıta josparlandy, — delingen mınıstrlik habarlamasynda.

Keshendi jańǵyrtý tek vokzal ǵımarattaryn ǵana emes, sonymen qatar jolaýshylar platformalaryn, vokzal mańyndaǵy alańdardy jáne ınjenerlik ınfraqurylymdy da qamtydy. Barlyq nysandar zamanaýı qaýipsizdik talaptaryna, sanıtarlyq normalarǵa jáne qyzmet kórsetý standarttaryna sáıkestendirildi.

Eldegi temirjol vokzaldarynyń basym bóligi 1950–1970 jyldary salynǵan, al keıbir ǵımarattar 80–100 jyldan astam ýaqyt boıy paıdalanylyp keledi. Nysandardyń shamamen 70 paıyzy ondaǵan jyldar boıy kúrdeli jóndeýden ótpegen.

Óńirler boıynsha rekonstrýktsııadan keıin kelesi vokzaldar ashyldy:

Abaı oblysy — Aýyl jáne Belaǵash stantsııalarynyń vokzaldary;

Aqmola oblysy — Kýrort-Býrabaı, Shortandy, Makınka jáne Aqkól;

Atyraý oblysy — Ganıýshkıno jáne Aqqystaý;

Batys Qazaqstan oblysy — Semıglavyı Mar, Qazaqstan jáne Shyńǵyrlaý;

Qaraǵandy oblysy — Qaraǵandy-Sortırovochnaıa, Jańa Qaraǵandy jáne Nura, sondaı-aq Qaraǵandy-Sortırovochnaıa stantsııasynyń jolaýshylar platformasy jańartyldy;

Qostanaı oblysy — Amanqaraǵaı jáne Qusmuryn;

Qyzylorda oblysy — Jańaqorǵan, Qazaly, Shıeli jáne Talap stantsııasynyń platformasy;

Almaty oblysy — Qonaev jáne Shamalǵan;

Jetisý oblysy — Taldyqorǵan;

Soltústik Qazaqstan oblysy — Taıynsha, Jańaesil jáne Saýmalkól;

Shyǵys Qazaqstan oblysy — Rıdder jáne Shemonaıha;

Pavlodar oblysy — Bozshakól platformasy.

Kólik mınıstrligi elimizdiń barlyq óńirinde jolaýshylar ınfraqurylymyn kezeń-kezeńimen jańartýdy jáne azamattar úshin zamanaýı, qaýipsiz jáne jaıly jaǵdaı jasaý jumystaryn jalǵastyrady.

Aıta ketelik Aqsaı qalasynda 90 jyldyq tarıhy bar vokzal kúrdeli jóndeýden keıin ashylǵan edi.