Elde jańa halyqaralyq qonaqúı jobalary iske asyrylýy múmkin

Taraptar Qazaqstanda qonaqúı bıznesin damytý perspektıvasyn talqylady. Serik Jumanǵarın atap ótkendeı, Úkimet týrıstik salany damytyp, halyqaralyq ınvestorlar men jetekshi qonaq úı operatorlaryn tartý úshin qolaıly jaǵdaı jasaýǵa erekshe kóńil bóledi. Qazaqstandyq tarap qonaqúı ınfraqurylymyn odan ári damytý úshin daıyn nysandar satyp alý, jumys istep turǵan ǵımarattardy jalǵa alý boıynsha birqatar usynys daıyndaǵan.

— Biz Barceló Hotel Group áleýetin joǵary baǵalap, kompanııany qonaqúı salasyndaǵy tabysty jobalardy júzege asyrýda baı halyqaralyq tájirıbesi bar senimdi áriptes retinde qarastyramyz. Yntymaqtastyqtyń perspektıvalyq baǵyttaryn talqylaýǵa jáne Qazaqstanda ózara tıimdi jobalardy júzege asyrý úshin jaǵdaı jasaýǵa daıynbyz, — dep atap ótti Serik Jumanǵarın.

Bul kezdesý ótken jyly Serik Jumanǵarınniń Sevılıada (Ispanııa) BUU-nyń damýdy qarjylandyrý jónindegi IV halyqaralyq konferentsııasyna qatysýy sheńberinde ótkizilgen kelissózderdiń jalǵasy. Sol kezde taraptar Barceló Hotel Group-tyń qazaqstandyq naryqqa shyǵý múmkindigin talqylaǵan bolatyn. Qazaqstandyq tarap kompanııa ókilderin eldiń ınvestıtsııalyq jáne týrıstik áleýetimen tanysý úshin Qazaqstanǵa shaqyrǵan.

Barceló Hotel Group ókilderi sapar sheńberinde Almatyǵa barady. Onda Astanadaǵydaı birqatar kezdesý ótkizip, qonaqúı bıznesin damytýǵa qolaıly nysandarmen tanysady.

Barceló Hotel Group — 1931 jyldan beri týrızm salasynda jumys isteıtin otbasylyq ıspandyq kompanııa. Shtab páteri Maıorka aralynda (Ispanııa) ornalasqan. Kompanııa qonaq úı, týrıstik agenttik pen avıakompanııa jelisine ıelik etip jáne ony basqarady. Álemniń 30 elinde 300-den astam qonaqúıdi biriktiretin Ispanııadaǵy eń iri operatordyń biri. 

Aıta ketelik «Báıterek» eksportty qoldaý men ınvestıtsııa tartýdy kúsheıtedi.