Elde jańa alma surpyn jersindirý jumystary júrip jatyr
ASTANA. KAZINFORM — Qazaqstanǵa Nıderlandtan 7 myńnan astam alma tamyrsabaǵy (telitýshi) jetkizildi. Kóshet sharýashylyǵy damyǵan elden ákelingen bul otyrǵyzý materıaly vırýstardan taza kóshet júıesin qalyptastyrýǵa negiz bolady. Ol ónimdilikti arttyryp, jemis sapasyn jaqsartýǵa múmkindik beredi.
Telitýshilerdi irikteý men jetkizý tuqymdar men otyrǵyzý materıaldaryn sertıfıkattaýǵa mamandanǵan Naktuinbouw halyqaralyq uıymynyń usynymdaryna sáıkes júzege asyryldy. Jetkizýshi — Vermeerderingstuinen Nederland kompanııasy, ol basic sanatyndaǵy ónim usyndy. Bul onyń joǵary sapasyn jáne halyqaralyq standarttarǵa sáıkestigin qamtamasyz etedi.
Qazaqstanǵa M9, MM106, MM111, B9, M7, P16 jáne P22 sııaqty tanymal serııadaǵy telitýshiler ákelindi.
Sonymen qatar, el ishinde de belsendi jumys istelip jatyr. Qazaq jemis-kókónis sharýashylyǵy ǵylymı-zertteý ınstıtýtynyń bıotehnologııalyq zerthanalarynda in vitro ádisi arqyly pre-basic jáne basic sanatyndaǵy shamamen 3 myń ósimdik ósirildi. Olardyń qatarynda otandyq selektsııanyń klondyq túrleri bar. Bul elimizdiń ǵylymı bazasynyń damyp kele jatqanyn jáne baý-baqsha salasyndaǵy áleýetiniń joǵary ekenin kórsetedi.
Almaty oblysynda, «Talǵar» fılıaly bazasynda, vırýstardan taza telitýshilerdi ósirýge arnalǵan arnaıy bazalyq ýchaske quryldy. Bul nysan sapaly otyrǵyzý materıaldaryn odan ári kóbeıtýdiń negizgi kózine aınalady. Sonymen qatar, munda kólemi 1,5 gektar bolatyn analyq-qalemshelik baq qalyptastyrylyp jatyr. Bul el ishinde kóshet óndirý kólemin edáýir arttyrýǵa jáne ımportqa táýeldilikti azaıtýǵa múmkindik beredi.
Jobanyń mańyzdy baǵytynyń biri — alma suryptarynyń assortımentin keńeıtý. Qazaqstanǵa Gala, Fuji, Golden Delicious, Granny Smith sııaqty suranysqa ıe kommertsııalyq suryppen qatar Rubinette, Topaz jáne Baya Marisa sekildi zamanaýı selektsııalyq jańalyqtar da ákelindi. Qazirgi ýaqytta olar jergilikti jaǵdaıda synaqtan ótip jatyr.
Joba Aýyl sharýashylyǵy mınıstrliginiń qoldaýymen ǵylymı-tehnıkalyq baǵdarlama aıasynda júzege asyrylyp jatyr. Vırýstardan taza otyrǵyzý materıaldaryn engizý baý-baqsha salasyndaǵy shyǵyndardy azaıtyp, ónimdilik pen sapany arttyrýǵa, sondaı-aq agrarlyq sektordyń eksporttyq áleýetin kúsheıtýge múmkindik beredi.
Aıta ketelik Qazaqstanda kómirtekti eginshilik topyraqty qalpyna keltirýdiń jańa baǵytyna aınalyp keledi.
