Elde jalǵan habarlama taratqan jasóspirimder 5 jylǵa sottalýy múmkin
ASTANA. KAZINFORM — Qazaqstanda terrorızm týraly jalǵan habarlama taratty degen kúdikpen 14-17 jastaǵy tórt jasóspirim ustaldy. Bul týraly ІІM Kıberqylmysqa qarsy is-qımyl departamentiniń bastyǵy Jandos Súıinbaı OKQ alańynda ótken brıfıngte aıtty.
Onyń sózinshe, jasóspirimder uzaq ýaqyt boıy eldiń ár óńirinde jalǵan habar taratyp kelgen.
— Qazir olardyń Astana, Shymkent, Taraz, Atyraý, Aqtaý qalalary men Almaty oblysynda tirkelgen 20-dan astam derekke qatysy bary anyqtaldy. Tergeý jalǵasyp jatyr, — dedi Jandos Súıinbaı.
Departament basshysy mundaı áreket aýyr qylmys sanalatynyn eskertti. Onyń aıtýynsha, Qazaqstanda terrorızm týraly jalǵan aqparat taratqany úshin qylmystyq jaýapkershilik 14 jastan bastalady.
— Mundaı qylmys úshin 5 jylǵa deıin bas bostandyǵynan aıyrý nemese 5 myń AEK kóleminde aıyppul qarastyrylǵan. Bıyl bul soma 21 mln 625 myń teńgege teń, — dedi ol.
Sondaı-aq, ol jalǵan habarlamalarǵa baılanysty oqıǵa ornyna shyqqan shuǵyl qyzmetterdiń shyǵyny da kináli taraptan óndiriletinin atap ótti.
Aıta keteıik, buǵan deıin Qazaqstanda ınternet-alaıaqtyqtan kelgen shyǵyn 20 mlrd teńgege jetkeni habarlanǵan edi.
