Elde jalǵan dıplomdar úshin qandaı jaza qarastyrylǵan
ASTANA. KAZINFORM – Ǵylym jáne joǵary bilim mınıstrliginiń Joǵary jáne joǵary oqý ornynan keıingi bilim komıteti jalǵan dıplomdarǵa qatysty qandaı jaza bar ekenin túsindirdi.
- Mádenıet jáne aqparat jáne Іshki ister mınıstrlikteri birlesip bilim týraly jalǵan dıplomdardy daıyndaý jáne satý faktilerin anyqtaý, sondaı-aq osyndaı zańsyz árekettiń jolyn kesý boıynsha turaqty negizde jumystardy iske asyrdy. Atalǵan jumystardyń nátıjesinde ІІM-men birlesip bıyl ınternet-resýrstaryndaǵy birneshe paraqsha men akkaýnttar buǵattaldy, - delingen vedomstvo aqparatynda.
Atap aıtqanda, Qazaqstan Respýblıkasynyń Qylmystyq kodeksiniń 385-babyna sáıkes, jalǵan qujattardy jasaý áreketine 2 000 aılyq eseptik kórsetkishke deıingi mólsherde aıyppul salynady nemese sol mólsherde túzeý jumystaryna, 600 saǵatqa deıingi merzimge qoǵamdyq jumystarǵa tartylady. Sonymen qatar 2 jylǵa deıingi merzimge bas bostandyǵyn shekteý nemese sol merzimge bas bostandyǵynan aıyrý jazasy qarastyrylǵan.
- Jalǵan qujatty paıdalanǵandarǵa 160 aılyq eseptik kórsetkishke deıingi mólsherde aıyppul salynady nemese sol mólsherde túzeý jumystaryna, sondaı-aq 160 saǵatqa deıingi merzimge qoǵamdyq jumystarǵa tartylady. Budan bólek, osyndaı zańsyz árketke barǵandar 40 táýlikke deıingi merzimge qamaqqa alynady, - dep atalyp ótken komıtet málimetinde.
Aıta keteıik, qazirgi kezde 46 jalǵan dıplom jáne olardy zańsyz daıyndaýmen aınalysqan 20 ınternet-resýrs anyqtaldy.
Buǵan deıin ShQO-da jalǵan dıplom jasatqan jattyqtyrýshy jazalandy.
Eske salsaq, dıplomdardyń zańsyz aınalymyn boldyrmaý úshin Mınıstrlik dıplomdardyń bazasyn qurdy.
