Elde zańsyz shyǵarylǵan aktıvterdi qaıtarý tetigi kúsheıtildi

ASTANA. KAZINFORM — Bas prokýror 2026 jylǵy 6 qańtardaǵy buıryǵymen Bas prokýratýranyń Aktıvterdi qaıtarý qyzmeti týraly erejeni bekitti.  

Aktıvterdi qaıtarý qyzmeti - Qazaqstan Respýblıkasynyń Bas prokýratýrasynyń qurylymdyq bólimshesi.

Qyzmet quramyna mynalar kiredi:

— Monıtorıng, taldaý jáne tekserýler basqarmasy;
— Aktıvterdi qaıtarý sharalary basqarmasy;
— Bas prokýrordyń aǵa kómekshisi (uıymdastyrý-baqylaý jumystary);
— Bas prokýrordyń kómekshisi (halyqaralyq baılanystar jónindegi).

Qyzmettiń negizgi mindetteri:

— «Memleketke zańsyz ıemdenilgen aktıvterdi qaıtarý týraly» zańda kózdelgen ókilettikter sheginde zańsyz alynǵan aktıvterdi anyqtaý jáne memleketke qaıtarý;
— Zańsyz ıemdenilgen, onyń ishinde shetelge shyǵarylǵan aktıvterdi memleketke qaıtarýǵa baǵyttalǵan sharalardy júzege asyrý;
— Aktıvterdi qaıtarý salasynda halyqaralyq-quqyqtyq yntymaqtastyqty damytý;
— QR zańnamalyq aktilerine jáne Prezıdent aktilerine sáıkes ózge de mindetterdi oryndaý.

Qyzmettiń fýnktsııalary:

— Memleket atynan jáne onyń múddesi úshin aktıvterdi qaıtarý jónindegi qyzmetti júzege asyrý;
— Zańsyz ıemdený men aktıvterdi shyǵarýǵa qarsy is-qımyl jasaý jáne olardy qaıtarý maqsatynda aqparatty monıtorıngteý, taldaý, jınaý, óńdeý, júıeleý jáne baǵalaý;
— Qaıtarýǵa jatatyn aktıvterge aýdıt júrgizý jáne baǵalaý, onyń ishinde úshinshi tulǵalardy tartý arqyly;
— Aktıvterdiń zańdy jolmen alynǵanyn (shyǵý tegin) tekserý;
— Memlekettik organdardan, uıymdardan, kvazımemlekettik sektor sýbektilerinen jáne laýazymdy tulǵalardan zańnamada belgilengen tártippen aqparat pen materıaldar suratý;
— Zańda kózdelgen áleýetti sýbektilerge jáne olardyń affılıırlengen tulǵalaryna qatysty sotqa deıingi tergep-tekserýlerdi tirkeý jáne (nemese) júrgizý;
— Aktıvterdi erikti túrde qaıtarý týraly jeke jáne zańdy tulǵalardyń ótinishterin qaraý jáne olar boıynsha sheshim qabyldaý;
— Múlikti tárkileý jáne aktıvterdi qaıtarý jónindegi halyqaralyq tájirıbeni zerdeleý;
— Aktıvterdi qaıtarý nátıjeleriniń zańdylyǵy men ashyqtyǵyn qamtamasyz etý;
— Zańsyz ıemdenilgen aktıvterdi memleketke qaıtarý máseleleri jónindegi komıssııanyń tıimdi qyzmetin qamtamasyz etý;
— Konstıtýtsııalyq zańdarda, zańdarda, Prezıdent pen Bas prokýrordyń aktilerinde kózdelgen ózge de fýnktsııalardy oryndaý.

Qyzmetke júktelgen mindetter men fýnktsııalardyń oryndalýyna jeke jaýapkershilik qyzmet basshysyna júkteledi.

Qyzmettegi jalpy jáne qupııa is júrgizý prokýratýra organdaryndaǵy qujat aınalymy qaǵıdalaryna jáne qupııalyq rejımin qamtamasyz etý jónindegi uıymdastyrý-ókimdik aktilerge sáıkes júzege asyrylady.

Atalǵan buıryq 2026 jylǵy 6 qańtardan bastap qoldanysqa engizildi. 

Aıta keteıik, zańsyz aktıvterdi elge qaıtarý arqyly áleýmettik ádildikti qalpyna keltirý — konıýktýra ne bolmasa jurtqa jaǵý úshin jasalǵan saıası naýqan emes. Bul týraly «Turkistan» gazetine suhbat bergen Memleket basshysy Qasym-Jomart Toqaev aıtqan edi.