Elde volonterlik qozǵalysty 2030 jylǵa deıin damytý jospary qaraldy
ASTANA. KAZINFORM — Astanada Halyqaralyq volonterler jylyn ótkizý jónindegi Ulttyq uıymdastyrý komıtetiniń IV otyrysy ótti, dep habarlaıdy Mádenıet jáne aqparat mınıstrliginiń baspasóz qyzmeti.
Astanada TMD elderi volonterleriniń alǵashqy forýmy qarsańynda BUU Qazaqstan Respýblıkasynyń Prezıdenti Qasym-Jomart Toqaevtyń bastamasymen jarııalaǵan Turaqty damý maqsatyndaǵy halyqaralyq volonterler jylyn (IVY-2026) ótkizý jónindegi Ulttyq uıymdastyrý komıtetiniń IV otyrysy ótti.
Jıynǵa Ulttyq uıymdastyrý komıteti tóraǵasynyń orynbasary, Qazaqstan Respýblıkasynyń Mádenıet jáne aqparat vıtse-mınıstri Evgenıı Kochetov, BUU Volonterler baǵdarlamasynyń atqarýshy úılestirýshisi Toılı Kýrbanov, Mádenıet jáne aqparat mınıstrligi Azamattyq qoǵam isteri komıtetiniń jáne Ulttyq volonterlik jeliniń ókilderi qatysty.
Otyrysta IVY-2026 aıasyndaǵy ulttyq jospar men halyqaralyq bastamalardyń iske asyrylý barysy qorytyndylandy. Qatysýshylar atqarylǵan jumystardyń nátıjelerin saralap, volonterlik salasyndaǵy yntymaqtastyqty odan ári keńeıtý joldaryn qarastyrdy.
Qazaqstannyń BUU Volonterler baǵdarlamasymen birlesken jumysy da sóz boldy. Búginde álemniń 60 elinde IVY-2026 ulttyq úılestirýshileri taǵaıyndalǵany aıtyldy.
— Sonymen qatar 2030 jylǵa deıingi volonterlik qozǵalysty damytý tujyrymdamasynyń jobasy qaraldy. Qujat volonterlikti uzaq merzimdi qoldaý men damytý júıesin qalyptastyrýǵa, memleket pen volonterler qaýymdastyǵy arasyndaǵy baılanysty jetildirýge jáne volonterlik qozǵalystyń ınstıtýtsıonaldyq negizin odan ári nyǵaıtýǵa baǵyttalǵan, — delingen habarlamada.
Jıynda Ulttyq volonterler front-ofısiniń elimizdegi volonterlik qozǵalysty damytýdaǵy róli atalyp ótti. Volonterlik bastamalardy úılestirý, uıymdarǵa ádistemelik qoldaý kórsetý jáne azamattardy volonterlik qyzmetke keńinen tartý máseleleri talqylandy. Otyrys qorytyndysy boıynsha Ulttyq uıymdastyrý komıtetiniń jumysyndaǵy aldaǵy basym baǵyttar aıqyndaldy.
Budan buryn elimizde volonterler sany 300 myńnan asqanyn jazǵanbyz.
