Elde volonterdiń tsıfrlyq pasporty engiziledi

Memleket basshysy Qasym-Jomart Toqaevtyń bastamasymen BUU 2026 jyldy turaqty damý maqsatynda Halyqaralyq volonterler jyly dep jarııalady.

Halyqaralyq volonterler jyly 30 qańtarda Prezıdenttiń qatysýymen ótken Volonterler forýmynan bastaldy.

Ataýly jyl sheńberindegi mańyzdy is-sharalardyń biri — 23 sáýirde Astana qalasynda ótken «Volonterlik jáne ekologııalyq áreketter» sessııasy. Іs-shara Óńirlik ekologııalyq sammıt aıasynda uıymdastyryldy.

Jıynǵa BUU Bas hatshysynyń orynbasary Haolıan Sıýı qatysyp, Ázerbaıjan, Qyrǵyzstan, Tájikstan, Túrikmenstan, Túrkııa, Ózbekstan, Koreıa Respýblıkasy, Japonııa jáne Aýǵanstannan kelgen 200-ge jýyq delegat bas qosty.

Volonterlik qaýymdastyqtyń qatysýymen tarıhı-mádenı nysandardy abattandyrýǵa arnalǵan «Mádenı murany birge saqtaıyq» aktsııasy, «Igi ister marafony» jobasynyń kóktemgi kezeńi jáne «Taza jaǵalaý — ortaq jaýapkershilik» halyqaralyq ekologııalyq bastamasy sekildi aýqymdy is-sharalar uıymdastyryldy.

Sonymen qatar jyl basynan beri «Taza Qazaqstan» respýblıkalyq aktsııasyna 120 myńǵa jýyq volonter atsalysty.

Memleket basshysynyń tapsyrmasyna sáıkes, 2030 jylǵa deıingi volonterlik qozǵalysty damytý tujyrymdamasy ázirlenip jatyr. Osy maqsatta Qaraǵandy, Shymkent, Taraz, Qostanaı, Almaty, Qyzylorda, Túrkistan, Kókshetaý, Semeı jáne Óskemen qalalarynda 250-den astam belsendi volonterdiń qatysýymen kóshpeli fokýs-top kezdesýleri ótkizildi.

Nátıjesinde 120-ǵa jýyq usynys pen bastama jınaqtaldy. Sonymen qatar ekologııalyq volonterlikti damytý baǵdarlamasy pysyqtalyp jatyr. Budan bólek, bıyl Volonterlikti damytýdyń ulttyq ındeksi men Volonterdiń tsıfrlyq pasporty qoldanysqa engiziledi.

Búginde volonterlerdiń qyzmetin úılestirý jumystaryn Ulttyq front-ofıs júzege asyrady. El óńirlerinde 20 front-ofıs jumys isteıdi. Sondaı-aq biryńǵaı Call-ortalyq pen 1200-den astam jobany jáne 3884 uıymdy biriktirgen Qazvolunteer.kz onlaın platformasy qyzmet kórsetedi.

Qazir 56 volonterlik joba men árqaısysynyń kólemi 1 mıllıon teńge bolatyn 60 shaǵyn grant bólý júzege asyrylyp jatyr.
Birikken Ulttar Uıymynyń Volonterler baǵdarlamasymen birlesip, Almaty qalasyndaǵy Ortalyq Azııa men Aýǵanstanǵa arnalǵan BUU-nyń turaqty damý maqsaty jónindegi óńirlik ortalyǵy bazasynda «Azııalyq volonterlerdi daıarlaý ortalyǵyn» qurý máselesi talqylanyp jatyr.

Sonymen qatar Tolyq qarjylandyrý baǵdarlamasy aıasynda bes qazaqstandyq volonter Dúnıejúzilik densaýlyq saqtaý uıymy, ıÝNISEF jáne Azyq-túlik jáne aýyl sharýashylyǵy uıymynyń halyqaralyq mıssııalaryna qatysý úshin Argentına men Qytaıǵa jiberildi.
Memleket basshysynyń bastamasy elimizdegi volonterlik qozǵalystyń damýyna tyń serpin berdi. Sonyń nátıjesinde belsendi azamattar qatary artyp, túrli is-sharalarǵa qatysqan volonterler sany 200 myńǵa jetti. 

Aıta ketelik Qazaqstan, Ázerbaıjan jáne Túrkııa volonterlik qozǵalysty damytýǵa kelisken edi.