Elde vırýssyz tuqymdyq kartop óndirý ortalyǵy qurylady
ASTANA. KAZINFORM — Aýyl sharýashylyǵy mınıstri Aıdarbek Saparov Qytaıdyń Inner Mongolia Muland Agricultural Technology Co., Ltd kompanııasynyń bas dırektory Veı Tszınlýnmen kezdesti. Kezdesý barysynda Qazaqstanda vırýssyz tuqymdyq kartop óndiretin joǵary tehnologııalyq ortalyq qurý jobasyn iske qosý máselesi talqylandy.
Mınıstr kartop ósirý agroónerkásiptik keshenniń strategııalyq mańyzdy baǵyty bolyp qala beretinin atap ótti. Ótken jyldyń qorytyndysy boıynsha bul daqyl egilgen alqap kólemi 131 myń gektar. Ortasha ónimdilik gektaryna 220 tsentner bolyp, jalpy ónim kólemi 2,8 mln tonnaǵa jetti.
— Tehnologııalyq turǵydan damyǵan ulttyq tuqym sharýashylyǵy júıesin qalyptastyrý — salanyń basty basymdyǵy. Bul tek jańǵyrtý ǵana emes, azyq-túlik qaýipsizdiginiń berik negizin qalyptastyrý. Bıotehnologııalardy damytý jáne vırýssyz otyrǵyzý materıalyn keń kólemde óndirý ımportqa táýeldilikti aıtarlyqtaı azaıtyp, ónimdiliktiń turaqty ósýin qamtamasyz etedi ári otandyq selektsııanyń básekege qabilettiligin jańa deńgeıge kóteredi, — dedi Aıdarbek Saparov.
Qazirgi tańda túpnusqa jáne elıtalyq tuqym óndirýmen 22 mamandandyrylǵan sharýashylyq aınalysady. Bul júıede bıotehnologııalyq zerthanalar sheshýshi ról atqarady. Atalǵan baǵyttaǵy jetekshi ǵylymı uıym — AShM Ulttyq agrarlyq ǵylymı-bilim berý ortalyǵynyń quramyndaǵy Qazaq jemis-kókónis sharýashylyǵy ǵylymı-zertteý ınstıtýty. Munda kartopty jedel vırýssyz kóbeıtý jáne ónerkásiptik ósirý tehnologııalary engizilgen.
Inner Mongolia Muland Agricultural Technology Co., Ltd kompanııasynyń ókilderi ozyq tehnologııalardy engize otyryp, zamanaýı zerthanalyq-jylyjaı keshenin qurýǵa qyzyǵýshylyq tanytty. Joba aıasynda mıkro jáne asa usaq túınekter óndirý qarastyrylǵan. Kompanııanyń óz ǵylymı-óndiristik ınfraqurylymy bar ári osyǵan uqsas jobalardy júzege asyrýda tájirıbesi mol. Sondaı-aq olar óz tehnologııalyq sheshimderimen bólisýge daıyn.
Joba joǵary sapaly tuqymdyq materıaldy ónerkásiptik kólemde óndirýdi jáne Ortalyq Azııa naryqtaryna baǵyttalǵan eksporttyq áleýet qalyptastyrýdy kózdeıdi.
Mınıstr jobaǵa jan-jaqty qoldaý kórsetýge daıyn ekenin jetkizdi. Óz kezeginde Veı Tszınlýn jobany jaqyn arada tájirıbelik turǵyda iske asyrýǵa kirisetinin aıtty.
Alǵashqy tuqymdyq materıal partııasy bir jyl ishinde alynady dep kútilýde.
Eske salsaq óńirlerdegi kartop baǵasy qansha ekeni týraly jazǵan edik.