Elde veterınarııalyq zerthanalardyń áleýeti kúsheıtiledi
ASTANA. KAZINFORM — Agroónerkásiptik keshendi damytý máseleleri jónindegi Qoǵamdyq keńestiń otyrysynda 2026–2030 jyldarǵa arnalǵan veterınarııany damytýdyń keshendi jospary qaralyp, maquldaldy.
Qujat salany júıeli jańǵyrtýǵa baǵyttalǵan jáne veterınarııalyq baqylaýdyń zamanaýı ádisterine kóshýdi, ınfraqurylymdy aýqymdy jańartýdy kózdeıdi. Jospardy iske asyrý eldiń bıologııalyq qaýipsizdigin nyǵaıtyp, eksportty damytý úshin qosymsha jaǵdaılar jasaýǵa múmkindik beredi.
Otyrysqa aýyl sharýashylyǵy mınıstri Aıdarbek Saparov qatysty.
Jospar jobasy Memleket basshysynyń tapsyrmasy aıasynda ázirlenip, oǵan memlekettik organdar, ǵylymı jáne sarapshylyq qaýymdastyq ókilderi, sondaı-aq veterınarııalyq preparat óndirýshiler qatysqan qurylymdyq top belsene qatysty. Barlyǵy 30 otyrys ótkizilip, 369 usynys qaraldy. Sonymen qatar qujat «Atameken» Ulttyq kásipkerler palatasynyń alańynda talqylanyp, tıimdi usynystar nazarǵa alyndy.
Keshendi jospar segiz negizgi baǵytty qamtıdy. Olar: janýarlardyń saýlyǵy men qaýipsizdigin qamtamasyz etý, azyq-túlik qaýipsizdigi, zerthanalyq áleýetti nyǵaıtý, eksporttyq naryqtardy keńeıtý jáne ishki naryqty qorǵaý, memlekettik retteýdi jetildirý, kadrlyq áleýetti damytý, veterınarııany tsıfrlandyrý jáne veterınarııalyq farmatsevtıkalyq ónerkásipti damytý.
Atap aıtqanda, azyq-túlik qaýipsizdigi salasynda tehnıkalyq bazany odan ári nyǵaıtý josparlanǵan. Ótken jyly 70-ten astam qaldyq zat túrin anyqtaýǵa múmkindik bergen toǵyz zamanaýı suıyqtyq hromatografy satyp alynǵan, qosymsha taǵy 54 zerthanalyq jabdyq birligin alý pysyqtalýda. Ónimniń «fermadan sórege deıin» qadaǵalaný qaǵıdatyn engizý jalǵasady, onyń ishinde veterınarııalyq saraptamany tsıfrlandyrý jáne soıý nysandarynda tańbalaý qarastyrylǵan.
Veterınarııa boıynsha Ulttyq referenttik ortalyqqa qutyrý boıynsha FAO zerthanasynyń jáne brýtsellez boıynsha Dúnıejúzilik janýarlar densaýlyǵy uıymynyń (WOAH) halyqaralyq zerthana mártebesin berý, sondaı-aq ǵylymı-ádistemelik fýnktsııalaryn keńeıtý jáne aýdandyq zerthanalardy kúsheıtý kózdelgen.
Eksporttyq múmkindikterdi keńeıtý maqsatynda shekaradaǵy veterınarııalyq baqylaýdy kúsheıtý maqsatynda maldy tekserýge arnalǵan arnaıy aımaqtar qurý jáne ilespe qujattarǵa qoıylatyn talaptardy arttyrý josparlanǵan.
Kadrlyq qamtamasyz etý de basty nazarda. Bul rette bilim berý baǵdarlamalaryn jańǵyrtý, mamandardyń biliktiligin arttyrý jáne eńbek jaǵdaılaryn jaqsartý qarastyrylǵan.
Tsıfrlandyrý tolyq qadaǵalaný júıelerin engizýdi, RFID sáıkestendirýge kóshýdi, sondaı-aq aqparattyq júıelerdi EAEO jáne EO elderimen ıntegratsııalaýdy qamtıdy.
Jalpy alǵanda, Keshendi jospardy iske asyrý turaqty epızootııalyq jaǵdaıdy qamtamasyz etýge, veterınarııalyq-sanıtarııalyq qaýipsizdik deńgeıin arttyrýǵa, zerthanalardyń akkredıtatsııasyn keńeıtýge, salanyń kadrlyq jáne tehnıkalyq áleýetin nyǵaıtýǵa, sondaı-aq ishki naryqta jáne eksport kezinde ónim sapasyn baqylaýdy kúsheıtýge múmkindik beredi.
Talqylaý barysynda Qoǵamdyq keńes músheleri jospardy tabysty iske asyrý, ınfraqurylymdy damytý jáne bıznespen ózara is-qımyl máseleleri boıynsha birqatar usynystar engizdi.
Otyrys qorytyndysynda Qoǵamdyq keńes músheleri qujatty qoldap, maquldaldy.
Aıta ketelik 11 óńirde aýyl sharýashylyǵy daqyldaryn saqtandyrý baǵdarlamasy júzege asyrylyp jatqany týraly jazǵan edik.
